La Liga: Hmahruaitu a la ngai; inkar erawh a zim
Krismas leh Kumthar inkar boruakah La Liga club tinten match khat ṭheuh an khel a, Spanish top flight league hi kumthar lawmin an chawl zui a, nizan aṭangin Copa del Rey an khel ṭan leh thung.
World Cup khelh hmaa La Liga hmahruaitu Barcelona chu hmahruaitu an la ni reng a, mahse, Krismas zawha an match hmasa berah Espanyol an inhnehtawkpui avangin pahnihna Real Madrid nen an point hmuh zat a inang.
La Liga-ah hian club 20-ten match 15 ṭheuh an khel tawh a, hmahruaitu Barcelona leh pahnihna Real Madrid ten point 38 ve ve an nei - Spanish top flight league-a champion tum inum chho a ngaihnawm dawn chauh.
Atletico Madrid pawhin palina ni chungin kumthar an lawm a, mahse, an hnuaia awm Athletic Bilbao leh Real Betis aia an sanna chu point hnih chauh a nih avangin fimkhur a la ngai hle.
Barca dinhmun
December 31 zanah Barcelona-in Catalan derby an khel a, Espanyol nen 1-1 in an inhnehtawk. Barca tan Marcos Alonso chuan goal hmahruai khung mah se Joselu titluin penalty a chawi leh a, Newcastle United striker hlui Joselu hian si phurh sut nan goal-ah a chantir.
Catalan derby 'hot' takah hian yellow card 16 leh red card pahnih phawrh a ni a, Barcelona leh Espanyol player pakhat ve ve hnawhchhuah an ni - Barca player Jordi Alba leh Espanyol midfielder Vinicius Souza te an ni.
Barcelona manager Xavi chuan inkhelh zawhah a player-te a hrem zui a, January 1 khan kumthar lawm tura chawlh nei tur ni mah se training a neihpui a, a bik takin a tlarhma player-te chu Robert Lewandowski-a innghat lutuk lo turin a hrilh niin an sawi.
Polish striker hian tun season-ah match 20 aṭanga goal 18 khungin, Barca tan top scorer a ni mek a, Catalan club zinga amah hnaihtu Ousmane Dembele leh Ferran Torres ten goal nga ve ve chauh inelna hrang hrangah an la khung.
Real beiseina
Krismas hnua an match hmasa berah Real Madrid-in 2-0 in Real Valladolid an hneh a, hliam vanga World Cup khel lo Karim Benzema chuan Spanish champion tan goal hnih hi a khung - a goal hmasa zawk hi penalty aṭanga a chhuih luh a ni.
Real Madrid hnehna chan hnuah Barcelona an chak zawh loh avangin team pahnih point hmuh zat a inang zui a, Real tan nomawi humhim beiseina a sang ve zel - La Liga a la hmuhnawm dawn chauh.
Madrid khaw club manager Carlo Ancelotti chuan, "Ka duh angin kan nghet tawk lo a, mahse, tun ang hun harsaah pawh point thum tho kan hlawh chhuak a ni," tiin a sawi a, an khelh chhiat lai pawha point thum an hlawh thei chu an lawm thu a sawi.
La Liga hi January 6 zan aṭangin khelh ṭan a ni leh dawn a, January 7 zanah Real hi an inlan leh dawn chauh a, Villarreal khelmualah an leng ang.
Top four?
Atletico Madrid-in point 11 zeta Barca leh Real an thlauh tawh avangin champion sawi rik ngam a harsa a, Diego Simeone-a naute tana beisei theih sang ber chu top four china season khar chu ni rihin a lang.
December 30 zan khan Atletico hian 2-0 in table mawngphah luahtu Elche chu an hneh a, Joao Felix leh Alvaro Morata ten goal khat ve ve khungin Champions League khelh an tum tih an pholang zel.
Atletico khelmuala inkhelah hian red card pathum phawrh a ni a, Atletico defender Mario Hermoso, Elche centre back Gonzalo Verdú leh midfielder Domingos Quina te chu hnawhchhuah an ni.
January 8, zan dar 1:30-ah Atletico hi an inlan leh dawn a, Barcelona nen an intawn dawn avangin an hmabak a awlsam dawn lo.
Copa del Rey
La Liga lam chawl mah se Copa del Rey erawh nizan aṭang khan khelh chhunzawm a ni a, Spanish Cup ngaihhlut hlawh tak hi round of 32 a ni tawh.
Nizana club langsar inlan zingah, zan dar 1:30 khan Real Madrid chuan Spanish fourth division club CP Cacereño an lenchilh a, he thu buatsaih a nih lai hian result kan hre hman lo.
Zanin dar 1:30-ah Barcelona an inlan dawn bawk a, Barca lenna tur hi third division club CF Intercity khelmual a ni a, harsa loa chak mai tura ngaih an ni.
Atletico Madrid chuan second division club Real Oviedo an lenchilh dawn a, zanin dar 12:30-ah an inlan ang - Barca leh Real ai chuan an hmabak a hautak hret.
December 29, Ningani Zan
Girona 2 - 2 Rayo Vallecano
GIR: Valentín Castellanos (PG) 34'; Samuel Sáiz (PG) 75'
RAY: Sergio Camello 2'; Isi Palazón 62'
Real Betis 0 - 0 Athletic Bilbao
December 30, Zirtawpni Zan
Atletico Madrid 2 - 0 Elche
ATM: João Félix 56'; Álvaro Morata 74'
Getafe 2 - 0 Mallorca
GET: Borja Mayoral 51', 78'
Celta Vigo 1 - 1 Sevilla
CEL: Gabri Veiga 33'
SEV: Kike Salas 54'
Cadiz 1 - 1 Almeria
CAD: Lucas Pérez 83'
ALM: Gonzalo Melero 40'
December 31, Inrinni Zan
Real Valladolid 0 - 2 Real Madrid
REM: Karim Benzema 83' (P), 89'
Barcelona 1 - 1 Espanyol
BAR: Marcos Alonso 7'
ESP: Joselu 73' (P)
Real Sociedad 2 - 0 Osasuna
RES: Brais Méndez 22'; Alexander Sørloth 64'
Villarreal 2 - 1 Valencia
VIL: Samuel Chukwueze 45'; Juan Foyth 88'
VAL: Edinson Cavani 21'
January 6, Zirtawpni Zan
Elche 11:00 PM Celta Vigo
Valencia 01:30 AM Cadiz
January 7, Inrinni Zan
Villarreal 08:45 PM Real Madrid
Mallorca 11:00 PM Real Valladolid
Espanyol 01:30 AM Girona
January 8, Pathianni Zan
Almeria 06:30 PM Real Sociedad
Rayo Vallecano 08:45 PM Real Betis
Sevilla 11:00 PM Getafe
Atletico Madrid 01:30 AM Barcelona
January 9, Thawhṭanni Zan
Athletic Bilbao 01:30 AM Osasuna
Copa del Rey - Round of 32
Zanin Inkhel Tur
UD Logroñés 11:30 PM Real Sociedad
Pontevedra 11:30 PM Mallorca
Linares Deportivo 11:30 PM Sevilla
Real Oviedo 12:30 AM Atletico Madrid
Intercity 01:30 AM Barcelona
Alaves 01:30 AM Real Valladolid
January 5, Ningani Zan
Ibiza Islas Pitiusas 08:30 PM Real Betis
Gimnàstic Tarragona 08:30 PM Osasuna
Eldense 01:30 AM Athletic Bilbao