Arsenal chelh theitu Newcastle United

Premier League hmahruaitu Arsenal chuan an mikhual Newcastle United lakah goal an khung thei lo a, 0-0 in an inhnehtawk. Mikel Arteta naute hian nikum march thla hnua a vawi khat nan Emirates Stadium-ah goal an khung lo.

Arsenal hian hnehna chang ni se la chuan point 10 zetin Manchester City lakah an sang fal ang, mahse an chak zawh loh avangin point riatin an sang, zanin Man City leh Chelsea inkhel result a zirin a la danglam thei bawk.

Magpies tan Arsenal khelmuala point hmuh hi thil ṭha a ni, anmahni khelmual bikah Arteta naute hi a zawna Premier League match 11 chhung chak thei an ni. Chutih rualin Eddie Howe naute hian Champions League khelh an tum ngam tih a takin kan hmu zel.

Arteta a lawm lo

Thawhlehni zan Emirates Stadium-a Premier League inkhel thununtu Arsenal lamin goal an khung thei lo. Forward Gabriel Martinelli leh defender Gabriel ten hun ṭha nei mah se goal zawnah an tauh thei tlat lo a ni.

Gabriel Jesus aiawhtu striker Eddie Nketiah che ziaawm viau mah se, keeper Nick Pope a paltlang thei bik lo. Dan Burn-a'n Gabriel a tih tluk vang leh, hun tawp dawna Jacob Murphy-a hand ball an ham loh vangin Arteta a lawm lo hle.

Thil thleng pahnih hi Video Assistant Referee (VAR) hmanga endik a ni a, amaherawhchu Gunners lam beisei hi pek a ni lo. Inkhelh banah Arteta chuan, "Penalty a ni ve ve, chu chu ka hmuh dan dik tak a ni, penalty pahnih min chhuhsak," a ti.

An khelh dan chungchang sawi zuiin Arteta chuan, "Inkhel kan thunun thei kha ka lawm, chutih rualin kan khingpuite goal bul hnaiah ball pass sual kan nei tam deuh, a hmawr bawk turin kan hriam tawk lo deuh bawk," tiin hmasawn an ngaihna lai a sawi.

Gunners striker rinrawl Jesus chu hliam vangin a chawl mek a, a hmun ruakah Nketiah awmin match hmasa lamah chuan a khel ṭha viau - Magpies lakah erawh remchang insiam a harsat, season chawhnu lam zelah hmatawng chu an mamawh belh.

North London club hian Mykhailo Mudryk chu Shakhtar Donetsk aṭanga lak tumin an hel mek a, lei an dilna hmasa hnawlsak ni mah se an dawr nawn niin khawthlang media lamin an tarlang, indawrna an la nei chhunzawm dawn.

Magpies an ṭha

Saudi Arabia sumdawng hausa kuta an luh khan Newcastle United hian player an lei pup pup dawn emaw ti tawk an awm, mahse a ni ngawt lo. Manager atana an lak pawh Howe a ni - mipui tam zawk beisei ang a ni kher lo ang.

Howe-a hian fing takin a player enkawl theih tur a thlang khawm a, hun rei vak lo chhungin team nghet ṭha pangngai tak a din ta. Leeds United laka an chak zawh loh khan an zuih dawn nia ngai an awm, tuna an chak zawh loh danah erawh lawmna tur an nei.

Ball chang tlem mah se an duh hunah an nawr thei viau tho a, a nihna takah chuan Joelinton-a'n tauh luh ngei tura ngaih goal pawna a tuh chhuah kha an ui ang, lut ni ngat se chuan Emirates Stadium aṭangin point thum an hawn lo ang tih a sawi theih loh.

Magpies manager Eddie Howe chuan, "Team ṭha tak laka kan inven theih dan kha a lawmawm hle, team thawhhona ṭha leh nghet tak mai kan lantir thei khan min ti lawm takzet. Tlar hma lam chu thuhran a ni se, a bik takin tlar hnung lama ka naute khelh danin min ti lawm zual," a ti.

Premier League an khelh hnuhnung 13-ah Newcastle United hian tlawm an nei lo, inelna hrang hrangah tun hnai hian match ruk chhung goal an chhuah lo, kum 1982 hnu lamah hetiang an tih leh theih vawi khatna a ni hial.

Howe chuan, "Kan hmabak langsar chu ball chelh rei theih a ni, chumi kan tih theih hunah chuan kan hlauhawm leh zual ang. Kan tan chuan inkhel zawng zawng hi a pawimawh a, nasa takin kan bei zel ang," tiin a sawi.