Mizoramin kawng dik an zawh

Santosh Trophy vawi 76-naah Mizoramin kawng dik an zawh a, nimin khan Rajasthan 4-0 in an hneh a, match li an khelhah hnehna an chang vek. Samson Ramengmawia hote hian point 12 an hmu a, group II-ah hmahruaitu an ni. Chutihrualin vawiin tlai dar 3:30 hian Kerala-in Jammu & Kashmir an hmachhawn dawn a, inelna thlengtu leh champion lai hian hnehna an chang a nih chuan goal difference hmangin Mizoram chungah an awm ang.

Mizoramin inkhel thunun mah se minute 59-naah goal an khung chauh a, Lalrokima'n goal hmahruai a khung. Goal luh hnuah Mizoramin goal bawh a na sawt a, Champhai Zotlang tlangval Lalbiakdika'n goal hnih a khung bakah Joseph Lalvenhima'n goal khat a khung bawk.

Group match hnuhnung berah Mizoram hian Kerala an la hmachhawn dawn a, he inkhel hian coach Samson-a hote hmalam hun a hril ang. Group hmahruaitu bakah pahnihna pathum an tling nghal dawn a, group III leh Group IV-a pahnihna Goa leh Odisha aiin Mizoramin point an hmu sang zawk dawn tih a chiang tawh. Chumi awmzia chu Mizoram tan pahnihna nichunga final round luh theihna kawng zau tak a inhawng a, pakhatna nih theihna kawng pawh a la inhawng zel bawk.