Europe club hnawla Asia club zawmtu Ronaldo

Cristiano Ronaldo chu Saudi Arabian club Al Nassr chuan an tlangzarh ta a, khawvel footballer ropui berte zinga mi hian European club hnen aṭangin sawmna dawng mah se, atan Europe-ah hlen chhuah leh tur dang a awm tawh lo tih a sawi.

Ronaldo sawi dan chuan - Europe, Brazil, Australia leh United States aṭangin sawmna a dawng a, amaherawhchu atan Asian football chu chona a ni tih a sawi bawk, a chanchin hian ngaihven a hlawh chhunzawm zel dawn.

Khawthlang media ten an tarlan dan chuan, kum khatah Ronaldo hian pound maktaduai 177 aia tam a hlawh dawn a, hetiang a nih chuan khawvela footballer hlawh hnem ber a ni ang - a contract hi kum 2025 thleng atan tih a ni bawk.

Hna ka zo

Sporting Lisbon aṭanga bul ṭantu Ronaldo hian Manchester United, Real Madrid leh Juventus tan nomawi chi hrang hrang a chawi hnem tawh, a tawi zawnga sawi dawn chuan, club inelna ngaihhlut hoah chuan a champion fai vek tawh.

Kum 37 mi Ronaldo chuan, "European club ṭha tak tak tan ka khel tawh a, hlawhtlinna chan theih zawng zawng chu ka chang tawh. Tunah chuan Asia hi ka tan chona a ni. Ka nuna thlutlukna lian tak ka siam hi a fuh hleah ka ngai," a ti.

Champions League bikah Ronaldo hian goal 140 a khung tawh a, a khung hnem ber. Ani dawta awm chu Lionel Messi niin, ani hian goal 129 a khung tawh thung, an inthlauhna hi goal 11 chauh a ni - Messi hi Paris Saint Germain tan a la khel mek.

Mi tam tak chian Ronaldo hian UCL khelh theihna tur club a zawm an ring a, media ṭhenkhat chuan UCL khel phak club lamin an lei duh lo, niin an sawi thung, thu dik ber erawh hriat a ni tawh bik lo.

Ronaldo chuan, "Duh ni ila chuan Europe-ah ka la inkhel thei. Heng bakah hian Brazil, Australia, United States leh kan ram Portugal-ah ngei pawh inkhel thei ka la ni, club tam takin min lak tumin min bia," a ti.

An lo lawm

Mipui 25,000 lenna Mrsool Park-ah fans an pungkhawm a, an player thar Ronaldo hming chu fans lamin an lam rual dual dual. Ballon d'Or vawi nga dawng tawh Ronaldo chuan, "Hlim taka awmtir cheu ka duh, chu chu ka thil tum a ni," tiin a sawi.

Saudi Pro League chungchang sawi zuiin Ronaldo chuan, "He league hi a awlsam loin a hautak tih ka hria, match tam tak pawh ka lo en tawh. Coach-in inkhel tura min duh a nih chuan ka inpeih nghal," tiin inkhelh a la chak zek zek hle.

Al Nassr head coach Rudi Garcia chuan, "Player ropui tak tak hi ka lo hmu tawh ṭhin. Cristiano hi enkawl a awlsam khawp ang, a chhan chu engmah zirtir belh tur a awm lo, engkim a thiam sa vek tih ka hrechiang.

"Ka thil tum chu hlim taka Cristiano awmtir a ni mai a, a club Al Nassr tana ṭha taka khelh tir leh, Al Nassr tana hlawhtlinna chang tura puih chu ka hna tur a ni," tiin a sawi. Press conference-ah hian club thuneitute zawhna a chhang a, media dang reporter an tel lo.

Team 16 inelna Saudi Pro League hian season an hmang mek a, match 11 an khelh tawhah Al Nassr hian point 26 hmuin hma an hruai mek a, pahnihna ni lai Al-Shabab chuan match 10 aṭangin point 25 an nei mek thung a ni.