Footballer ropui Pele a chawl hahdam ta

Mi tam takin footballer ropui ber ang hiala an chhal, football hmuhnawmna leh ropuina belhchhahtu Pele chu kir leh tawh lo turin zalh a ni ta a, khawvelin ui tak chungin 'King of football' hming lem an pek Pele an thlah a, a chawl hahdam ta.

October 23, 1940-a Edson Arantes do Nascimento hmingpua lo piang Pele hi December 29 zan khan rilpui cancer vangin a thi a, nimin khan amah ngeiin, a dam laia zalh a nihna tur atana a lo lei tawh, Memorial Ecumenical Cemetery hmunah zalh a ni.

Santos khawpui ropuina belhchhah a, khawvel hriata he khawpui tihmingthangtu Pele hi mipui nuai telin an thlah a, Santos FC chuan an player ropui bik hi mi 230,000 velin an stadium-ah an thlah niin an sawi - kawtthlera thlahtu lah nuai tel an ni.

Kum 82 mi nia thi Pele hi an ram President atana thlan thar Luiz Inacio Lula da Silva pawhin a hmunah a thlah a, an ram fapa rangkachak chu a hmuna thlah loh a phal lo.

Mangṭha legend

Pele hi a club khelhna ṭhin, Santos FC khelmual Urbano Caldeira-ah darkar 24 chhung dah niin, mipuiten an ngaihsan em em mi ropui hi an thlah ve theihna turin hun ṭha siamsak an ni.

Mittui luang zawih zawih chunga Pele thlahtu an awm a, aw rawl chhuah meuha ṭap hawm hawm pawh hmuh tur an awm - khawvelin a dem lo a ni mai lo a, a ṭahpui a, Pele liam tur chu ui takin an thlirpui.

Pele hi Thawhlehni khan a thlan lam panin fire truck-ah phurh a ni zui a, Santos khawpuia mipui pungkhawm chu tam tak an ni - a kuang chu vawi tam tak a lo chawi kan tawh Brazil leh Santos FC puanzar hmanga tuam a ni a, a inhmeh takzet.

Police venhimna hnuaia Pele kuang phurh hi, a nu Celeste Arantes chenna hmun paltlanga kalpui a ni - Pele nu hi kum 100 mi a ni tawh a, Pele nu chenna paltlang a nih lai hian mipui chu an ngawi reng a, a kut suih chungin a nu Celeste hi a ṭawngṭai.

A thamral ta

England legend leh footballer ropui Sir Bobby Charlton khan, "Football hi a tana duan bik ang mai a ni," tiin, kum 15 mi lek ni chunga a professional career zinkawng ṭantu Pele chungchang a lo sawi tawh.

Chu Brazilian naupang, retheihna ngam a, football hmanga nun khawchhuahna kawng daptu chuan football vangin ei tur hnianghnar takin a hmu a ni mai lo a, football khawvela mi ropui ber ang hiala tam takin an ngaih khawpin a hming a chher.

Pele hian kum 1958, 1962 leh 1970 te khan World Cup nomawi a chawi a, World Cup-a vawi thum champion thei awmchhun a ni - kum 21 zet a inkhelh chhungin match 1,363-ah goal 1,281 a khung a, Brazil tan match 92-ah goal 77 a khung.

Mahse, hlun lo tura duan kan nihna khawvelah chung ropuina zawng zawng pawh chu Pele chelh turin a tling tawk lo a, mittui nen mi ropui bik chu thlah a ni ta tho - aw, thihna, i rawng teh e!

An zalh ta

Kum 19 liam taah khan Pele hian a thih huna an zalhna tur hmun a lo thlang thlap tawh a, Memorial Ecumenical Cemetery-a hmun pakhat chu a lei - he thlanmual hi khawvela thlanmual chhawng sang ber a ni!

Santos khawpuia thlanmual hi 430,000 sq feet-a zau a ni a, a chhungah hian restaurant, biak in, automobile museum, tuikhuah leh sava khawina thlengin a awm.

Pele an zalhna tur bik hi 2152.78 sq feet a zau a la ni a, football stadium anga cheibawl a ni ang - artificial turf phahin, a laiah Pele kuang dah a ni ang a, a vanglaia a thlalak mawi tak tak hmangin chei mawi a ni dawn bawk.

Player a nih laia Santos leh New York Cosmos tana a hun hmang zotu Pelé hian he thlanmual a thlan chhan chu, "Thlanmual a ang lo a, thlarau hahdamna leh lungmuanna min pe a ni," tiin a lo sawi tawh a , a hmun thlanah ngei zalh a ni ta.

A tawp nan

Pele thlah a nih hian, mi tam takin an mittui seng mah se, tam tak chuan ṭap hmel pu duh loin, chhuang tak chungin football legend hi an thlah a, "Pele chauh, 1,000 goals" tiin fans tam tak chu an au rual hial.

Fans ṭhenkhat chuan Pele fakna leh uina thu ziakin, banner nen player ropui hi an thlah a, tam takin, a hak lar em em, number 10 chuanna jersey ha chungin an thlah bawk.

Santos FC chuan, "Kan lal ni kumkhua tur Pele chuan a in Vila Belmiro-ah, a mipuite nen inmangṭhana hun an hmang ta," tiin social media lamah an pholang a, an khelmuala an player ropui ber thlahna chu an pho chhuak mawi thiam hle.

Tunah erawh Pele a awm ta lo a, a pa, a nutei, a unaupa leh a fanu an zalhna, kum 1960 chhoa Santos FC tana a khelhpui Antonio Wilson Honorio (Coutinho) pawh zalh a nihna hmunah zalh a ni a, footballer ropui bik chu mangṭhain a awm ta.