Zorammuana'n semifinal lut

National Boxing Championships, Hisar, Haryana-a khelh mekah Mizo boxer Zorammuana chuan nimin khan quarterfinal-ah Karnataka boxer Pavan Kumar N chu 5-0 in a hneh a, flyweight (48-51 kg) huang inelnaah semifinal a lut.

Tuipui boxer Zorammuana hian semifinal a luh avangin hnehna chang zo lo pawh ni se bronze medal chu Mizoram tan a rawn hawn dawn tihna a ni - semifinal-ah hian Jammu & Kashmir boxer Mohammed Aarif nen an intawng ang.

Semifinal hi vawiinah khelh tur a ni dawn a, bout thumna velah North East Olympics 2022-a gold medal latu Zorammuana hi inlan tura beisei a ni a, he thu buatsaih a nih lai hian a inlan hun tur tak a la chiang thei lo.