Chelsea mikhual tur Man City

Arsenal-in point an hloh a, Premier League champion lai hmahruaitu Manchester City tan an inkar tihzimna remchang a awm. Zanin dar 1:30 hian Pep Guardiola hote hi Chelsea hmachhawn turin Stamford Bridge-ah an lenglut ang.

City goal khung khawl Erling Haaland-a'n goal khung chhunzawm zel mah se Pep-a hote hi Everton-in Etihad Stadium-ah 1-1 in an chelh. Mak ang reng tak erawh City meuh chelh thei Toffees hi Thawhlehni zan khan Brighton & Hove Albion-in 4-1 ngawtin an sawp - hei hi Chelsea tan beiseina siamtu a ni thei ang.

Chutihrualin Blues erawh manager Thomas Tuchel an ban hnuah hmasawn lam aiin hniam lam an pan zel niin a lang a, club neitu thar Todd Boehly-a'n player lei nan pound maktaduai 250 bawr vel theh chhuak tawh mah se eng ruai an la ang lo.

Thlasik bazarah pawh Chelsea thawm a na a, London club hian Stamford Bridge-ah Argentina champion puitu Enzo Fernández lakluh tumin hma an la mek. Zaninah erawh Graham Potter-a'n a neihsa player a hman thiam a ṭul dawn a, tlarhnung a remphui ṭhat a ṭul dawn.

Kum 38 mi Thiago Silva chu Chelsea tan rinrawl a ni a, Brazil captain leh Kalidou Koulibaly ten Haaland dan an tum dawn. Norwegian striker hian goal 21 khung turin match 15 chiah a mamawh a, Premier League history-a goal 20 khung rang ber hian goal 30 khung rang ber record pawh a siam chhunzawm mai a rinawm.

Chutihrualin Man City duh ber hi nomawi a ni a, Haaland-a record aiin an ngai pawimawh zawk. Blues hian Haaland hi an chelh thei a nih pawhin City hian World Cup-a Argentina champion puitu Julian Alvarez pawh an la kawl. Team pahnih hi January 8, Pathianni zan hian FA Cup-ah an intum lehnghal bawk ang.