Inrintawkna leh beiseina kan nei leh ta - Shaw

Manchester United-in Thawhlehni zan khan AFC Bourne-mouth chu Old Trafford-ah 3-0 in an hneh a, inkhelh banah hnehna an chan theih nana player pawimawh Luke Shaw chuan, "Inrintawkna leh beiseina kan nei leh ta," tiin a sawi. Erik ten Hag-a hote hi November thlatira Aston Villa an hneh loh hnuah match ruk an chak zawn tawh a, Old Trafford bikah match sarih an chak zawn tawh.

Premier League bikah Man United hi match li an chak zawn a, match 17-ah point 35 hmuin an chung chiaha awm Newcastle United nen point hmuh zat inang chungin match khatin an khel tlem. Red Devils hian khelh zat inangah an hnuaia awm Tottenham aiin point ngain an hmu tam zawk bawk.

Goal thum chu

Old Trafford-ah Man United an chungnung zawk a, an chakna zat pawh goal thum a ni. Minute 23-naah Christian Eriksen-a freekick pet chu Casemiro-a'n chiang zetin goal-ah a chantir. First half-ah 1-0 a ni.

Minute 49-naa Shaw-a'n goal ṭha bik a khung a, team goal mawi tak niin English left back hian a thawh hlawk hle. Shaw hian mual vei lam aṭangin chak takin ball a la chhuak a, thui tak a khalh hnuah Anthony Martial a pe a, French forward hian Bruno Fernandes pein ani hian Alejandro Garnacho pe lehin Argentine winger cross chu Shaw-a'n a goal-ah a chantir.

Man United-in minute 86-naah goal thumna an khung. Shaw-a ball vawrhluh ṭha bik chu Bruno Fernandes-a'n vawi khatah a cross nghal a, goal ruakah Marcus Rashford-a'n a khung.

United ṭha zawk

Ten Hag-a'n player duhsak bik a nei lo a, tun hnaia che ṭha Rashford pawh thawh a hai avanga inkhelh hmaa 'team meeting' a nan hman loh avangin Wolves lakah bench-ah a dah. Dutch manager hian Cristiano Ronaldo pawh a duhsak bik lo a, a chhuah phal hial - Rashford erawhin a tihsual a pawm thung.

Man United-in thlasik bazarah Ronaldo thlakna la nei lo mah se Portuguese forward tel loin an ṭha zawk. Rashford hian World Cup-ah goal thum a khung a, Qatar aṭanga a zin haw hnuah match li khel leh tawhin goal a la khung vek.

Team chakna hnar erawh Casemiro tiin a sawi theih. Brazilian midfielder hi season tir lamah khelhna hmun a chan tam loh avangin Ten Hag lak ni loin United board lak a ang hman hial. Tunah erawh Casemiro hian tun hmaa United neih loh mual laia inkhel thununtu a ni tih a pholang a, Real Madrid kulhpui ni ṭhin hi McFred (Scott McTominay leh Fred) te nen an inthlau hle. Cherries laka goal hi chu Casemiro hlutna belhchhahtu chauh a ni a, mual laia an khingpuite in pass tur a dang chat leh a ṭhiante tana ball a pe kual chu team tan a hlu hle.

Cherries lakah hian captain Harry Maguire leh Victor Lindelof ten bul an ṭan a, tun hmaa rinrawl ni ṭhin hi Lisandro Martínez leh Raphael Varane te thachhangdawltu an ni mah tawh zawk. Chuti chung chuan Maguire leh Lindelof te an khel ṭha a, mual dinglamah Aaron Wan-Bissaka a rintlak chho leh ta bawk. Chutihrualin tlarhnung pali zinga khel ṭha ber erawh Shaw a ni.

Ten Hag-a'n player chhawr tur a ngah chho a, Newcastle United-in goalkeeper Martin Dubravka ko kir mah se David de Gea-a'n a vanglai hun a hmang ṭha leh ta. Spanish keeper hian Jaidon Anthony goal khung tur chu ṭha zetin ṭum hnih ngawt a dang.

United hian insiamṭhatna tur erawh an la ngah a, mual sir aṭanga an goal bawh a na tawk lo. Cherries laka inlan lo Antony leh Jadon Sancho te an theihna anga an khelh theih chuan mual sir buaina pawh chinfel theih a ni ang. Chutihrualin Thawhlehni zan khan Donny van de Beek chu hliam vangin lak chhuah a ni a, United-in goal thum khungin point thum hlawh chhuak mah se an lawm a kim lo ang.