Copa del Rey - Real an chak

Spanish football-a inelna ngaihhlut hlawh Copa del Rey round of 32 chu Thawhlehni zan aṭang khan khelh ṭan a ni ta a, Real Madrid chuan fourth division club Cacereno chu 1-0 in an hneh.

Kum 2014 hnua Copa del Rey nomawi la chawi lo Real tan Rodrygo chuan inkhela goal awmchhun a khung a, Real an hmachhawn avang ringawta lawm tawk Cacereno-in a chhanletna tur an nei lo.

Thawhlehni zana La Liga club inlan langsar zingah Valencia chuan 3-0 in La Nucia an hneh a, third division club lakah hian Justin Kluivert, Ilaix Moriba leh Hugo Duro ten goal khat ṭheuh an khung.

Nizan khan Barcelona leh Atletico Madrid chu Copa del Rey-ah hian an inlan bawk a, he thu buatsaih a nih lai hian an result kan hre hman lo.

A harsa lo

Spanish fourth division-a inlan ni mah se Cacereño-in second round-ah La Liga club Girona chu 2-1 in an lo petchhuak tawh a, Real laka thilmak a thlen nawn beisei chungin an inlan.

Hetihlai hian Real boss Carlo Ancelotti chuan player ṭhenkhat chawlh hahdamtir hun a ni tih hriain, La Liga-a Real Valladolid hmachhawn team aṭangin player pakua ngawt a siksawi.

Real Madrid aṭanga chhuak tur anga sawi thawm awm reng Eden Hazard pawhin inkhel bul a ṭan a, mahse, tun season-a match sarih aṭanga goal khat chauh khungtu forward hian fourth division club lakah pawh goal a keng tel lo.

Minute 68-naah Hazard hi lakchhuah a ni a, lakchhuah a nih aṭanga minute khat hnu lawkah Real-in Rodrygo hmangin goal an khung zui a, chak nan an hmang.

Pele, i tan

Minute 69-naah Rodrygo hian defender pahnih a bum hnuah, goal chung kil sirah mawi zetin a thlawh lut a, player thiam bik pet goal awm renga mawi a ni.

Brazilian forward hian boruak hnek chungin a goal khung a lawm a, hei hi kar hmasa Ningania thi, footballer ropui Pele goal khung lawm dan a ni - a kutin van lam a kawk bawk a, Pele tan a goal khung a hlan.

Kum 21 mi Rodrygo hi Brazilian club Santos aṭanga hriat hlawh a ni a, June 2019 khan Real hi a zawm - Pele kha a hun tam zawk Santos tana hmangtu a ni a, match 659-ah goal 643 a khung.

Real hian fourth division club an tum miau avangin goal tam zawk khung tura beisei an ni a, mahse, goal khat bak an khung zui ta lo - kum 2014 hnua a vawi khat nan Copa del Rey champion an beisei zel.

Inkhel dang

La Liga club pahnih chu second division club-in round of 32 aṭangin an pet chhuak a, Sporting Gijón chuan Uros Milovanovic goal hnih hmangin Rayo Vallecano chu an hneh a, Getafe pawh Levante lakah 3-2 in an tlawm - Getafe tan Wesley Moraes chuan hun pek belhah chakna goal a khung.

La Liga mawngphah luahtu Elche-in Spanish Cup lamah pawh result ṭha an nei thei lo a, third division club Ceuta lakah 1-0 in an tlawm - Rodri chuan goal awmchhun a khung a, tun season league match-a chak la nei miah lo Elche hian minute 61-naah an forward Ezequiel Ponce chu red card vangin an chân.

Top division club inkhelah Espanyol chuan 3-1 in Celta Vigo an hneh a, hun pangngaiah 1-1 in inhnehtawk mah se extra time-ah Espanyol hian Sergi Darder leh Nico Melamed hmangin an khung leh a, an chak.

Villarreal an chak awlsam a, second division club Cartagena chu 5-1 in an sawp. Catagena hian Pablo Vázquez hmangin goal khung hmasa mah se Villarreal hian Álex Baena, Arnaut Danjuma, José Luis Morales, Samuel Chukwueze leh Étienne Capoue hmangin an chhanglet a ni.