Vawiin tlai aṭangin I League ṭan leh dawn

India rama football inelna sang ber dawttu I League chu vawiin tlai dar 2:30 aṭangin khelh ṭan leh a ni dawn a, Trau leh Sudeva Delhi te an inkhel ang. Manipur club Trau hi paruknaah an awm mek a, Sudeva erawh table mawngphahah awmin match riat khelh tawh aṭangin point khat chiah an hlawh chhuak.

Sudeva hian Japanese coach Atsushi Nakamura hnuaiah bul an ṭan a, Nakumara hi India rama Japanese coach hmasa ber ni mah se a hlawhtling lo. Match hmasa pasarihah Sudeva hi an chak lo fai vek a, December thlatir khan Nakumara hi an ban.

Tuna Sudeva enkawltu hi Sankarlal Chakraborty a ni a, Sanjoy Sen hnuaia Mohun Bagan enkawlin coaching zinkawng a ṭan. Sankarlal hi kum 47 mi a ni tawh a, ama pualin Mohun Bagan, Bhawanipore leh Mohammedan te a enkawl tawh a ni.

Sudeva hi nikuma an match hnuhnung berah Mohammedan SC nen 1-1 in an inhnehtawk a, Sankarlal hnuaiah point an hmu nghal. Krismas leh kumthar vuakvetah I League chawlh a ni a, Sudeva-in training-na hun ṭha an nei - vawiin hian Trau lakah fiahna an hmachhawn ang.

Mizo club Aizawl FC-in December 20 khan Rajasthan FC 1-0 in an hneh lo a, kumin atana an match hmasa ber chu January 9, Thawhṭanni hian RG Stadium-ah table chunglama mi Real Kashmir mikhualin an khel ang.