Tihsual neih a thiang lo - Manolo

Hyderabad FC head coach Manolo Marquez chuan zanin dar 7:30-a FC Goa nen an inkhelh hunah chak an duh chuan, tihsual an neih a thian loh thu a sawi.

Hyderabad hian tun season-a league match 12 khelh aṭanga point 28 neiin, table-ah pahnihna an ni mek a, hmahruaitu Mumbai City an phak lohna chu point hnih chauh a ni tawh.

Marquez chuan, "Game harsa tak a ni dawn. Khualmualah aiin mahni mualah result an nei ṭha ṭhin zawk a, coach ṭha tak an nei a, top six tal chu an ni dawn - team pahnih tan game hautak a ni ang.

"An khelh dan an la thlak lo a, kan intum hmasakin kan ti ṭha tawk lo. Hetiang ang game-a hnehna chan hi kan tan a ṭha a, Goa hneh kan tum chuan tihsual neih a thiang lo ang," a ti.

ISL-ah league round-a hmahruaituin AFC Champions League an khel ṭhin a, Hyderabad-in top four an khelh ngei beiseiawm mah se league hmahruaitu nih an duh - chumi tur chuan tlawm a thiang tawh lo.

Hyderabad hian Mizoram player pathum kawl mah se hmun pawimawh an chang phak lo a, FC Goa lamah Aizawl FC academy chhuak Ayush Chhetri chu player pawimawh a ni thung - an match hnuhnung pahniha chak zo lo Goa hi table-ah pangana an ni mek.