Carrick hnuaiah Boro an vul

Michael Carrick-a'n October thla tawp khan Championship-a 22-naa awm Middlesbrough an enkawl ṭan a, January thlatir a thlen meuh chuan Boro hi panganaah an awm tawh. Kum 41 mi Carrick hnuaiah Boro hian point 30 hmuh theih aṭangin point 22 an hmu a ni.

Middlesbrough hi January 7, Inrinni zan hian Brighton & Hove Albion nen FA Cup-ah an inhmachhawn dawn. Carrick hoten Premier League club lakah fiahna an hmachhawn dawn a, chutihrualin Boro tan FA Cup-a thlen san aiin season thara Premier League khelh a pawimawh zawk.

Boro hi Carrick vangin ngaihven an hlawh thar hle. English manager hian Boro hi pre-season training neihpui hman lo mah se possession football a khelhpui a, match hnuhnung bera Birmingham an hneh ṭum pawhin 61% ball an chan bakah goal thum an khung.

Carrick hnuaiah Arsenal aṭanga inzir chhuak Chuba Akpom a che ṭha a, English striker hian league match 19 aṭangin goal 13 a khung tawh. Boro hi playoff khel thei dinhmunah an ding mek a, hmabak erawh a la harsa dawn.

Chutihrualin season ṭantirh lama tla thei dinhmuna ding kha Carrick hnuaiah Premier League beiseina an nei chho. English manager hian Manchester United kha ṭum thum a enkawl hman a, Villarreal leh Arsenal an hneh bakah Chelsea nen an inhnehtawk. Boro a enkawl hnuah vawi hnih chiah chak loh a la nei a, November thla khan manager of the month-ah thlan a ni hial.