Hooda-a'n India a chakpui

India leh Sri Lanka chuan zanin dar 7:00 hian T20 match thum an khelh tura vawi hnihna chu Maharashtra Cricket Association Stadium-ah an khel dawn. Thawhlehni zan khan India hian Wankhede Stadium-ah Sri Lanka hi run hnihin an hneh hram.

T20 match hmasa berah hian Sri Lanka hi ṭhumvawrah an vannei a, vawm hmasak an thlang. India tan Deepak Hooda leh Axar Patel ten thi loin 41 leh 31 runs an siam a, over 20-ah 162/5 runs an siam. Sri Lanka tan Kusal Mendis (28), captain Dasun Shanaka (45), Wahindu Hasaranga (21) leh Chamika Karunaratne (23*) te an khel chhe lo a, ball tawp ber thlengin inkhel a nung.

Over tawp berah Sri Lanka tan chak turin 13 runs siam a la ngai a, India tan nuamsaa awm theih a ni lo. Men in Blue tan Axar Patel a rawn pen chhuak a, ball hmasa ber a vawm wide bakah ball hmasa pathumah run sarih an siam sak bawk.

Sri Lanka tan chak turin ball thumah run ruk siam a ngai a, Deepak Hooda-a'n a fielding ṭhatzia a pholang. Hooda-a'n Kasun Rajitha leh Dilshan Madushanka te a 'run out' tir ve ve a, a tawpah India hi run hnihin an chak hram.