500 Not out = Lionel Messi

Barcelona thiampuipa Lionel Messi chuan Ningani zan khan Leganes lakah goal hnih a khung a, Copa del Rey quarterfinal lut turin Leganes chu 5-0 in an hneh. 

Messi tan Barcelona  jersey ha chunga vawi 500 hnehna a channa a ni a, hetih chhung hian Catalan club tan goal 623 a khung tling ta bawk. 

Argentine forward bakah hian Antoine Griezmann, Clement Lenglet leh Arthur te chuan goal khat ṭheuh an khung a, Leganes-in a chhanletna tur an nei lo. 

Hetihlai hian Sevilla chuan rin loh takin second division club Mirandes chu 3-1 in an ngam lo a, Mirandes tan Matheus Aias chuan goal hnih khungin Álvaro Rey chuan goal khat a thawh bawk. 

Sevilla tan hian Nolito chuan minute 90-naah an goal neih chhun a khung a, mahse La Liga club tan 'comeback' thlentir turin hun a awm tawh lo. 

Mirandes goal thumna khungtu Álvaro Rey hi Seville khawpuia pianga, Sevilla fans chhungkua aṭanga seilian a ni. Mirandes hma hian Real Madrid, Valencia, Athletic Bilbao, Villarreal, Granada, Real Sociedad leh Barcelona te chuan Copa del Rey quarterfinal hi an lo lut tawh. 

Rey chuan, "Ka chhungte chu keimah vangin an hlim em em ang tih ka ring. Hlawh min petu chu Mirandes an ni a, he club tana ṭha ber tur hi ka tih a ngai a ni," tiin a club ṭan laka a goal khung chungchang a sawi. 

Season thara Champions League khelh beisei Sevilla hian Pathianni zan dar 11:00-ah league match khel turin Alaves an mikhual dawn a, Barcelona chuan Pathianni zan dar 1:30-ah Levante an mikhual thung ang.