Pathianni tlai dar 3:00-ah Mizoram Vs Kerala

Santosh Trophy vawi 76-naah Mizoram chuan Pathianni tlai dar 3:00 hian inelna thlengtu Kerala chu group match hnuhnung berah an hmachhawn dawn. Team pahnih hian an khingpuite an la hneh vek a, amaherawhchu champion lai Kerala hi an goal difference a ṭhat zawk avangin Mizoram tan hmahruaitu ni tur chuan chak a ngai dawn a ni.

EMS Stadium, Kozhikode-a inkhel hi youtube channel 'SportsCast India' hmangin a en theih dawn. Kerala hi champion lai an ni ringawt lo a, vawi sarih champion tawh an nih avangin ṭum khat champion tawh Mizoram aiin an buk a rit zawk.

Mizoram vs Kerala

Mizoram Premier League awm hma chuan Mizoram hian football-ah state dang a elphak lo hrim hrim a, MPL awm hnuah erawh team ṭha zinga chhiar theih an ni ta thung.

Mizo coach langsar H. Vanlalthanga hoin Mizoramin kum 2014 khan Santosh Trophy nomawi an chawi a, hemi ṭum hian final round-ah Mizoram hian Kerala hi 3-1 in an hneh.

Kum 2015-ah pawh final round-ah group khatah an awm nawn leh a, Mizoram hian 1-0 in an hneh. Team pahnih hian semifinal lut ve ve mah se final an thleng zo lo ve ve thung.

Kum 2016-ah Mizoramin final round thleng mah se semifinal an thleng pha lo a, Kerala erawhin final round an thleng pha lo hrim hrim.

Kum 2017-ah group khatah an awm leh a, Kerala hian 4-1 in hnehna an chang. Team pahnih hian semifinal an lut ve ve a, final erawh kum 2015 ang thoin an thleng pha lo ve ve.

Kum 2018-ah group khat an awm dun lo a, semifinal-ah inhmachhawnin Kerala hian 1-0 in an vannei a, an champion zui bawk.

Kum 2019-ah Kerala leh Mizoram ten final round an lut pha lo a, Covid-19 vangin kum 2020 leh 2021-ah inelna neih neih theih a ni lo. Nikum khan Mizoramin final round an thleng pha lo a, Kerala erawhin final-ah West Bengal bawk hnehin an champion.

Kerala an ṭha hret

Kum 2018 census aṭanga chhutin Kerala-ah mi nuai 346.3 an awm a, Mizoram-ah erawh mi nuai 10.9 vel chauh an awm thung. State pahniha mipui cheng zat a inthlau ringawt lo a, an inhausak hleih bawk.

Football-ah pawh Mizoram hian West Bengal chauh ni loin Kerala pawh hi a elpha lo lam hret a ni. Kerala hian I League-ah Gokulam Kerala an nei a, ISL-ah Kerala Blasters an nei bawk. Team pahnih hi an awmna league-ah team ṭha zinga mi ve ve an ni. Chutihrualin Mizoram pawhin I League-ah Aizawl FC a nei tho a, Mizo player-te talent neih ṭhat zarah club lian zawk elpha mah se Kerala club-te nen budget a inthlau hle.

Tun ṭum Santosh Trophy-ah pawh hian team pahnih khelh tawhna thlirin Kerala hi an chungnung hret. Inelna thlengtu hian goal 19 an khung ringawt lo a, goal khat chauh an la chhuah. Mizoram pawhin an khingpui hneh vek mah se goal 13 an khung a, goal thum an chhuah - Kerala record a ṭha zawk.

Engtin zel?

Mizoram assistant coach Lalrindika Ralte chuan, "Mizoram Tualchhung football tuipui tam tak te ngaihah team ṭha tak kan hruai lo mai thei. Mahse kan phak ang tawkin hna tha thawk turin kan bei a, Aizawlah training-na hun tam kan neih loh a lang ve deuh bawk avangin game duhthusam tak kan khel chhuak ṭhin lo. Chuti chung chuan point kan la hmu vek hi a lawmawm khawp mai," tiin Vanglaini a hrilh a, Mizoram team ṭha ber an hruai loh thu a sawi.

MPL9-a FC Venghnuai final thlenpuitu coach Rindika chuan, "Team boruak ṭha tak neih kan duh a, chu chu kan team-ah kan hmu a, chhawm nung zel pawh kan duh," tiin a sawi a, team boruak ṭha hi group match hnuhnung berah pawh an innghahna tur a ni ang.

Santosh Trophy 2023 Thlirna Tawi 

• First round-ah team 36 an awm a, group parukah ṭhendarh an ni.

• Services leh Railways ten team 12 awmna tur final round an lut sa.

• Final round thlengtu an tling nghal dawn a, a thlengtu tur tih chian la ni lo mah se Delhi chu inelna thlengtu tura ngaih a ni.

• Group hmahruaitu ṭheuh an tling nghal ang a, pahnihna zinga ti ṭha pathum an tling bawk ang.

• Final round thlengtu hi an inpettling tawh a nih chuan an awmna group-a pahnihna chu pakhatna niin an tling ang a, pathumna chu pahnihna anga chhiar tur a ni. Delhi hian final round thleng se chuan group I-a pahnihna hauh mektu Karnataka chu an tling nghal ang a, Gujarat (9 pts) neitu chuan pahnihna dinhmun luahin final round luhna kawng a inhawng dawn tihna a ni.

• Tun dinhmunah Delhi (group I), Goa (group III) leh Meghalaya (Group V) te chuan pakhatna dinhmun luah chungin final round an lut tawh. Mizoram awmna group II-in round khat khelh tur an la nei a, group IV leh group VI te an la khel ṭan lo.

• Group I-ah Karnataka (12 pts, GD : 16), group III-ah Nagaland (11 pts, GD : 4), group V-ah Odisha (10 pts, GD : 14) ten pahnihna dinhmun an nemnghet tawh.

• Mizoram hian match hnuhnung berah Kerala hi an hneh lo a nih pawhin Nagaland leh Odisha chungah an awm tawh. Samson Ramengmawia hote tan pahnihna nichunga tling nghal tur chuan Karnataka chungah awm a ngai a, Kerala an draw a ngai. Chutihrualin Mizoram hian Kerala an hneh chuan pakhatna nichungin an tling nghal ang.

• Mizoram hi chak ta lo pawh ni se Delhi-in final round an thlen chuan an tling pha dawn a, group IV (Chhattisgarh, Dadra & Nagar Haveli and Daman & Diu, Haryana, Madhya Pradesh, Maharashtra leh West Bengal) leh group VI (Chandigarh, Himachal Pradesh, Jharkhand, Lakshadweep, Manipur leh Punjab) te result a zirin an tling thei bawk