Champion zia chhuahtu Man City

Premier League champion lai Manchester City chuan Chelsea 1-0 in an luhchhuah. Stamford Bridge-ah Pep Guardiola naute hian duhthusama ṭhain an khel bik lo, mahse an mamawh ber point thum an hlawh chhuak. Pathianni zan dar 10:00-ah Man City-in Chelsea an mikhual lehnghal dawn a, hei erawh Premier League ni loin FA Cup third round a ni thung ang.

Citizens hian league match 17 aṭangin point 39 an hmu a, hmahruaitu Arsenal nen an inkar chu point ngaah an sawr zim. Blues erawhin point 25 chauh an la nei; Champions League khel phak china awm Manchester United an phak lohna chu point 10 lai a tling ta.

Ningani zan inkhelah Graham Potter-a naute an inveng thei viau, first half-ah phei chuan an khel ṭha zawk. Mahse, minute 63-naah Riyad Mahrez chuan Jack Grealish siamsak a khung a, point thum hlawh chhuah nan a tawk.

Buaina a zual

N'Golo Kante, Ruben Loftus-Cheek, Edouard Mendy, Armando Broja, Mason Mount, Ben Chilwell, Reece James leh Wesley Fofana te chu hliam vanga inkhel thei lo sa an ni, anni ho ringawt pawh hi buaina tham an tling.

Man City laka bul ṭantu Raheem Sterling chu ṭan chiahah an inhliam a, minute ngana lekah Pierre-Emerick Aubameyang-a'n a rawn thlak. Christian Pulisic pawh hliam vang thoin minute 22-naah Carney Chukwuemeka-a'n a thlak bawk. Coach Potter tan chuan luhai thlak ve vat vat tur tak chu a ni, ruahmanna thlak a ngai zing dawn hle.

Mahse, Blues hi an khel ṭha angreng viau, Pulisic thlaktu Chukwuemeka-a'n box pawn aṭangin goal ban a pet per, keeper Ederson-a'n dang phak lo mah se Man City an vannei a, goal banin a chhanhim.

Defender Thiago Silva pawhin hnai tak aṭangin goal ban sirah a hlap chhuak, an vanneih ṭum ni se la chuan Man City kha an hneh emaw, a chhe berah pawh point khat an hlawh emaw tal a ni ang, mahse an vanduai ṭum a ni miau si.

Chak lo mah se inkhelh banah Chalsea fans lamin an player-te hi kut bengin an lawm, an khel che loin theihtawp an chhuah tih a chiang. Chutih rualin point hmuh an harsat chhunzawm zel a nih chuan an lawm reng hauh lo ang.

Champion zia

Manchester City khelh ṭhat zan a ni lo, tun hnaiah Everton nen an inhnehtawk bawk avangin Guardiola naute hian point an hloh mai rinna pawh a lian hman. Defender nathan Ake-a ball tauhin bar a per dawp kha an vanduai chhunzawmna tur pawh a ang.

Mahse, pound maktaduai 100 man Grealish-a'n ball hlauhawm a pe chhuak a, keeper man tam Kepa Arrizabalaga-a'n a chhut fuh tawk loh bakah Marc Cucurella-a'n a ven tur Mahrez a veng hneh tawk lo bawk, Blues lam hian tih ṭhat zeuh theih se an duh khawpin a rinawm.

Goal thun khawl Erling Haaland meuh pawh match zawng zawnga goal khung tur chuan beisei chi a ni bik lo - mihring ve tho a nih vangin. Khelh ṭhat tawk loh ni pawha goal khung mai thei player an kawl avang erawhin Man City hi champion nawn tura rinkai an la ni.

Chelsea nen an inkhelh hmain Pep chuan, "Tun ang zela an khelh chuan Arsenal hi kan umphak thei tawh lo ang," tiin an chunga awm, an elpui ni bawk Gunners a chhaih zauh a, khelmual pawn lam inbeihna pawh a ngaihnawm zel dawn.

January thla chhungin Man City hian Premier League bikah Manchester United, Tottenham leh Wolves an la tum dawn; February thla tirah Spurs nen an inkhel chhunzawm leh nghal ang, an hmabak a hautak dawn hle.