Best challenger-ah Mizo boxer

National Boxing Championships chu nimin khan khelh zawh a ni a, Mizoram aiawh zinga final thleng awmchhun Zorammuana chu 'best challenger'-ah thlan a ni a, India camp-ah koh a ni bawk.

Tuipui boxer Zorammuana hian flyweight (48-51 kg) final-ah Services Sports Control Board (SSCB) boxer Bishwatira Chongthan a hmachhawn a, unanimous decision (5-0 ) hmanga chak loh avangin silver medal-ah a lungawi a ngai ta thung.

Mizo tlangval hi final-ah a vanduai avangin Mizo boxer zingah National Boxing Championships-a gold medal la an la awm lo. Inelna hi Hisar, Haryana-ah neih a ni a, Mizoram Boxing Association (MIZBA)-in sum dinhmun harsat avangin SAI sumin Mizoram aiawhte hi an kal a, Mizoram aiawha kalte hi SAI boxer-te vek an ni.