Harh ngai Chelsea

Neitu thar Todd Boehly an neih hnua Chelsea thil tih langsar ber tia chhal ngam chu Thomas Tuchel an ban kha a ni a, manager thar Graham Potter an neih hnuah an duh leh beisei ang thil erawh a thleng hleithei lo.

Defender hrang hrang lei nan pound maktaduai 200 chuang an hmang tawh a, an tlar hnung phui lo chu an buaina langsar a la ni si. Arsenal duh loh hnu Pierre-Emerick Aubameyang kha, bench aṭanga lut ni mah se a khelh chhiat em avangin thlak a ngai leh hial.

Premier League season kal laiah goal 20 chauh an la khung a, hei hi hmahruaitu Arsenal khung zatve chauh a ni! Manchester City phei chuan goal 45 an khung tling tawh, an elpui ni ṭhin club lian dangte nen an tlar hma a in hriam hleih hle.

Tlar hma lama an rinrawl Sterling hi striker a ni lo a, forward Kai Havertz pawh season khata goal khung ṭeuh chi a ni lem lo. Tuna an mamawh chu goal khung thiam a ni a, an neih thar tur Christopher Nkunku lahin nipuia a zawm chauh dawn.

Champions League khel phak chin chauh hi Chelsea teh nan a tawk rih lo, tun dinhmunah chuan relegation zone aṭangin point 10 chauhin an him. League match hnuhnung pariat aṭanga vawi khat chauh chak an ni a, an dinhmun hi a ṭha lo.

Hliamin a ti buai tih chu phat rual a ni lo, chutih rualin Chelsea hian player lei nan sum an hmang hnem a, coach ṭha Tuchel meuh thlak thei tura an lakluh Potter hian a player neih ang ang hmang chunga point hlawh chhuah dan a hriat a pawimawh.