Inbuatsaihna hun kan nei tlem bik - Wolves coach

Zanin dar 1:30 hian Liverpool chuan FA Cup third round khel turin Wolves an mikhual dawn. Premier League club pahnih inkhel tur an nih avangin a boruak a nung nghal - Wolves coach Julen Lopetegui chuan Reds chu inbuatsaihna hun nei hnem ber tiin a sawi.

Thlasik laiin World Cup khelh a ni a, season khat chhunga match khelh tur a tlem phah si lo. Tun hnai ni 23 chhungin Wolves pawh hian match ruk an khelh a ngai dawn, player siksawi thiam a ngai ve khawp ang.

Thawhṭanniah Liverpool hian Brentford 3-1 in an ngam lo a, zanina an khingpui tur Wolves erawhin Nilainiah Aston Villa an hmachhawn ve chauh a, 1-1 in an inhnehtawk thung, hahchawlhna leh inbuatsaihna hun chu an ngah hret.

Wolves coach Lopetegui chuan, "Tournament thuhmun kan khel a, tuna kan inelna hmachhawn leh tur pawh a ngai tho a ni. Ka hriatthiam loh lai chuan inelna thuhmun khel ni tho siin kan khelh ni a inang lo hi a ni.

"Ni khata danglam chu a la hriatthiam theih, thil thleng thei pangngai a ni. Mahse, FA Cup inbuatsaih nan Liverpool hian keini aiin ni hnihin hun an ngah zawk, hei chu a tam mah mah, kei chuan ka hrethiam ve thei lo," tiin a sawi.

Wolves hi Premier League table mawngphah lama talbuai lai an ni a, coach thar Lopetegui kaihhruaina hnuaiah indin thar an tum mek. EPL bakah League Cup leh FA Cup khelh tur an la nei a, hei vang hian chawlh hahdamna hun an nei rih lo.

Liverpool pawh league lama beisei phak lo an ni. Jurgen Klopp-a naute hi Brentford laka tlawm hlim an nih avangin dah san an harsa rih, chutih rualin zanina an inkhelhna tur hi Anfield a nih avangin rinkai zawk erawh an ni dawn.

Insiamṭhatna hun a ni tih sawiin Reds defender Ibrahima Konate chuan, "Mimal takin Wolves hi ka la hmachhawn ve lo, mahse Liverpool nena an inkhel chu ka en fo tawh a, team ṭha leh hlauhawm tak an ni tih ka hria, player zingah mimal taka ka hriat pawh an awm.

"Brentford lakah kan chak lo hlim chauh a la ni a, kan ṭhat lai ber chu a ni lo chiang. Chutih rualin kan squad-ah hian theihna nei sang tak tak an awm, chuvangin kan tan chuan FA Cup hi insiamrem theihna remchang tak a ni ang," a ti. Inhlaim vanga Virgil van Dijk a khelh theih dawn loh avangin Konate hian tlarhnungah hmun pawimawh a chang ang.

Thlasik bazara an lei thar Cody Gakpo chuan Ningani khan training a zawm pangngai tawh. German coach Klopp-a'n a duh a nih chuan Netherlands international hi Wolves lakah a chhawr thei tawh ang, a inlan a nih pawhin minute 90 erawh a la khel lo ang.