Raducanu kerek a hliam

Australian Open khelh hmain ni 10 chauh a awm tawh a, player hmuhnawm tur zinga mi Emma Raducanu chu kerek hliam vangin ASB Classic aṭangin a inhnukdawk, a chawlh chen tur a chiang lo.

Last 16 inkhelah Raducanu hian Viktoria Kuzmova lakah set khatna chu 6-0 in a la, nuamsa taka chak tur angin lang mah se court a hmang thiam chhunzawm tawk lo, set hnihna chu 5-7 in a hloh, set thumna khel thei loin a inhnukdawh a ngai ta a ni.

Britain nula Raducanu chuan, "A nihna tak sawi chuan court kha a nal a, tawlh a awlsam hle. Player dang an inhliam a nih pawhin a mak lo ang," tiin a inhliam chhan chu an inkhelhna hmun fuh tawk loh vangah a puh.

Tennis season khat chhunga Grand Slam hmasa ber Australian Open chu January 16 aṭangin Melboure Park-ah khelh ṭan a ni dawn. US Open champion hlui Raducanu hi a inlan thei a nih pawhin duhthusama ṭha inbuatsaihna chu a nei dawn lo tihna a ni.