Chelsea striker hlui Vialli a thi

Chelsea striker leh manager hlui Gianluca Vialli chu kum 58 mi niin nimin khan cancer vangin London-ah a thi.

Vialli hi kum 2017 khan ril bawh cancer (pancreatic cancer) a nei tih hriatchhuah a ni a, April 2020 khan cancer hi a hneha ngaih ni mah se kum 2021 khan cancer natna hi a rawn lang leh a ni.

Italian Football Federation (FIGC) president Gabriele Gravina chuan, "Gianluca hi pa ṭha tak a ni a, a hmunruak hi hnawh khah theih a ni lo ang. A thih hma thleng khan thilmak hi a thlen leh ka beisei a, a thleng ta si lo. Italian football tana a hnathawh hi theihngilh a ni tawh lo ang," tiin a sawi.

FIGC chuan kartawp Serie A inkhel zawng zawngah Vialli hriat reng nan minute khat ngawi renga an din tur thu an tichang bawk.

Vialli hian Italy tan kum 1985 aṭang khan a khel ṭan a, Azzurri tan vawi 59 khelin goal 16 a khung. Italian striker hian Sampdoria, Juventus leh Chelsea-ah sulhnu ṭha tak a nei a, Azzurri-in Euro 2020 nomawi an chawi khan coaching staff-ah a tel bawk.