Ka naute ka ringtawk - Pioli

Tun hnaiah hliam vangin buai viau mah se AC Milan manager Stefano Pioli chuan a naute a ringtawk tih a sawi. Serie A champion hian Pathianni zan dar 1:15-ah AS Roma chu San Siro-ah an lo mikhual ang.

Tun dinhmunah Milan player pasarih ngawtin mimal training an neih a ngai. Mike Maignan, Ante Rebic, Simon Kjaer, Divock Origi, Rade Krunic leh Junior Messias te chu dam tawh mah se team training pangngai an la zawm thei lo.

Alessandro Florenzi leh Zlatan Ibrahimovic te chu hun rei tak chhung chawl tawh an ni a, anni pawh hian training zangkhai deuh nei tawh mah se an la inkhel thei mai dawn lo, an lo kir hun tur tawk sawi theih a la ni lo deuh.

Milan manager Pioli chuan, "A awlsam dawn lo tih chu kan hria, mahse inkhel khawp player kan nei a nih phawt chuan Milan hi kan zam ngai lo. Milan jersey ha phak chin tawh chuan an tih tur leh tih loh tur an hre vek.

"Hliam vangin buai mah ila, tawnhriat nei ṭha leh rawlthar ṭha tak tak kan la nei. Salernitana lakah pawh buai tura ngaih kan ni a, mahse point thum kan hmu thei, tunah pawh khatiang bawk kha kan beisei leh ang," tiin a sawi.