Chelsea-in Enzo an dawr danah Benfica lawm lo

Benfica manager Roger Schmidt chuan Chelsea chu an midfielder Enzo Fernandez lakluh an tum danah che mawi lo, tiin a sawisel a, Premier League club chungah a lungawi lo hle.

World Cup 2022-a Argentina champion theih nana player pawimawh Enzo hi lakluh tumin Chelsea chuan an dawr a, Benfica-a a contract-ah chuan a duh tan pound maktaduai 106 bawra leichhuah theih a nih thu a inziak.

Schmidt chuan, "Enzo duhtute rawn chet dan hi inzah lohna lian tak a ni a, Benfica pawh an zah lo a, an chet dan hi pawm dam mai harsa tak a ni," a ti a, Chelsea chet dan a dem.

Benfica boss chuan, "Player kuai lungleng hmasa te te a, release clause pe thei awm taka awm a, a hnua sawi ṭhat leh duh bawk si loh hi, player chungchanga club pahnih indawr dan tur niin ka hre lo," a ti.

World Cup khelh zawh taka Best Young Player dawngtu hi December 31 khan Benfica tan a inlan leh tawh a, mahse, khualmualah Braga chu 3-0 ngawtin an ngam lo.

Schmidt chuan sawi zawmin, "Enzo hi hralh kan duh lo a, Benfica mi leh sa zingah hralh duh an awm lo. Mahse, chhuah theihna dan a nei tih kan hre vek - player-in chhuah a duh a, a release clause an pek bawk chuan kan chân mai a ngai a, kan dang thei tlat lo a ni.

"Tunah hian kan player duhtu an awm a, hralh kan châk lo tih an hriat avangin an lam ṭanga siam an tum a ni. Mahse, a clause an pek chauhin an lei thei tih an hre chiang khawp ang," a ti!

German coach chuan sawi zawmin, "Enzo hi mi fel tak, footballer ṭha tak a ni. Benfica-a a cham kan duh vek. Mahse, World Cup khelin a champion a, pawisa tam tham taka sawmna a hmu hnem hle.

"Player naupang zawk tan chuan hetiang huna thutlukna siam thiam hi a harsa ṭhin khawp mai. Kar hmasa pawh khan kan zingah a tel lo a, Argentina-a kal phalna pek ni si loin training a rawn zawm lo a, hei hian nghawng chu a nei ngei ang," a ti a, Chelsea chet dan a dem hle.

Enzo hian tun season-ah Benfica tan match 25 khelin goal thum a khung a, assist vawi nga a nei bawk.