Atletico Madrid khelmualah hmahruaitu Barcelona

Barcelona-in La Liga-ah hma hruai mek mah se an hnuai chiaha awm Real Madrid nen an point hmuh zat a inang a, an san zawkna chhan chu goal difference chauh a ni.

La Liga-ah Barca leh Real champion inchuh boruak a sang chho dawn chauh niin a lang a, team pahnih inum boruak kara danglamna thlen theitu chu Atletico Madrid an ni bawk - kartawpah Barca nen an intawng dawn!

Pathianni zan dar 1:30-ah Barcelona hian Atletico Madrid hi an lenchilh dawn a, Atletico an ṭhat bakah khualmuala leng tur an nih avangin Barca tan fimkhur a ngai lehzual a, tlawm a thiang lo.

Atletico hi table-ah palina an ni mek a, Barca an thlauhna pawh point 11 lai a ni. Mahse, zaninah Diego Simeone-a naute hi an chak chuan an inkarah point riat chauh a awm tawh dawn a, Atletico tan beiseina thar neih leh a thiang ang.

Lewy tel lohna

Barca boss Xavi-a'n tun hnaiah a striker chhuanvawr Robert Lewandowski chauha innghat lo turin a player-te a chah a, Polish striker tel loa goal khung an harsat lutuk chu chinfel a duh thu a sawi.

Mahse, Xavi-a beisei angin thil a kal vek bik lo a, zanin match pawimawhah pawh a hmanraw hriam bera chhal ngam Lewy hi a inlan ve thei dawn lo - hrem a nihna chu kaltlangpui a ni dawn.

Barcelona hian World Cup chawlh hmaa an league match hnuhnung berah 2-1 in Osasuna hneh mah se an lawm a kim lo - an thiampuipa Lewy-a'n yellow card pahnih a hmuh vang a ni.

Lewy hi red card vang hian match khat chauh hrem ni mah se, referee laka a lungawi lohna a lantir nasat avangin Spanish football association chuan match hnih chhung atan an hrem belh.

A chhan?

Lewy hian Osasuna nen an inkhelh khan an khingpui player David Garcia chu a kiuin a nghawk a, yellow card a lo hmuh tawh sa bawk avangin hnawhchhuah a ni zui - match hnih dangin an la belh cheu!

Kum 34 mi striker hian hremna pumpelh a nih theih nan court lam a pan a, Madrid court-in thiam chantir mah se Spain rama infiamna court sang ber chuan a hrem ta tho.

Kar hmasa kha chuan Espanyol nena an inkhelah Lewy hi a inlan hman a, Catalan club ve tho Espanyol hi an lungawi lo a, club President leh board member-te chuan inkhel hi a hmunah an en duh lo hial.

Mahse, Espanyol hnuah erawh league match thum inlan lo turin a hremna chu pawm leh a ni a, Atlertico bakah Getafe leh Girona an hmachhawn hunah a inlan ve thei dawn lo.

Siamṭhat ngai

Barcelona hian World Cup hnua an match hmasa berah Espanyol an tawng a, 1-1 in an inhnehtawk - champion tum Barca fans an lawm lo a, a awm lo hran lo.

Hetah hian a la tawp mai lo - Nilaini zan khan player ṭha rual engemaw zat an inlan chungin, Spanish third division club Intercity chu 4-3 in an hneh hram a, chakna goal hi extra time-a an khung a ni!

Barca phur vanglai a ni lo ang tih a chiang a, mahse, champion an tum ngam tak tak dawn a nih chuan Atletico ang team ṭha laka chak a ṭul - an chak chuan team tan phurna thar nasa tak a ni ang.

Catalan club tan Lewy bakah full back Jordi Alba chu hrem vangin a inlan thei dawn lo a, Barca tana player pahnih ṭangkaina thlir chuan uiawm an tling.