Hyderabad tan Ogbeche-a'n hattrick a siam

Beisei anga season hmang ṭha lo Bartholomew Ogbeche-a'n rintlak a la ni reng tih Hyderabad FC tan a pholang a, Paris Saint-Germain striker hlui hian FC Goa lakah hattrick a siam - tun season-a goal ruk a khungna chiah a ni.

Ogbeche hian minute 20-na lekah goal hmahruai a khung a, Goan club tan Redeem Tlang chuan minute 54-naah si phurh hi a sut - team pahnih hi point insema an ṭin mai rinna a lian hman hle.

Mahse, Nigerian striker Ogbeche-a'n ngaihdan dang a nei a, minute 79-na leh 90-naah goal khung lehin hattrick a siam a, Hyderabad hi hnehna a chanpui zui.

Hyderabad-in hnehna an chan avangin ISL table chung ber an luah zui a, pahnihna Mumbai City aia match khata khel tamin point khatin an sang zawk - league hmahruaitu nih inchuh boruak a la sang dawn chauh.

FC Goa tan Ayush Dev Chhetri-a'n inkhel bul a ṭan a, Ningani zan ISL inkhelah hian Mizoram player dang inlan an awm lo thung.

Hyderabad boss Manolo Marquez chuan, "Minute 55 emaw 60 kha chu kan inkhel ve mang lo a ni," tiin chak mah se an khelh ṭhat tawk loh thu a sawi a, a naute hnen aṭangin a ṭha zawk a la beisei.

FC Goa coach Carlos Pena chuan, "Zanin chu kan tan football hi a fair tawk lo a ni," tiin chak phu mah se an vanduai zawk thu a sawi ve thung a, inkhel enten coach pahnih thusawi an ṭawmpui ang.

Goan club-in hnehna chang zo lo mah se semifinal khelh beiseina a la bo lo a, mahse, point li ngawta top four an hlat tak avangin Goan club tan hmabak a hautak sawt dawn thung.