Cameroon naupangten kum endik an zo lo!

Fédération Camerounaise de Football (FECAFOOT) president Samuel Eto'o chuan Cameroon Under-17 player-te kum endik hna khirh takin kalpui mah se, player tam zawk kum a dik loh avangin an buai hle!

Cameroon Under-17 hian January 12-24 inkarah African Cup of Nations qualifier an khel dawn a, hemi atana player kohte kum chu a dik tak tak leh tak tak loh hriat nan Cameroon football-a thuneitu sang ber, FECAFOOT president Eto'o chuan Magnetic Resonance Imaging (MRI) hmang turin thu a pe.

Mbankomo-a training camp-ah MRI hmanga player-te endik an nih chuan squad-a koh player 30 zinga 21-in test an paltlang zo lo a, Congo, Chad, DR Congo leh Central African Republic te nen AFCON qualifier khel tur Cameroon an talbuai.

AFCON Under-17 inelna hi April khian Algeria-ah khelh a ni dawn a, Cameroon-te awmna group aṭang hian team pahnih an tling dawn. Mahse, Eto'o-a'n dik taka thil kalpui a tum a, an tlin loh chance a sang ta zawk!

Player 21-in test an paltlang loh hnuah pawh koh thar player 11 zetin test an paltlang zo chuang lo a, coach Jean Pierre Fiala chu player tur ngaihtuahin a lu a hai hle niin an sawi.

FECAFOOT chuan thuchhuah siamin, Eto'o chuan kum dik tak player-te an kal theih nan player kum endik hi khauh taka kalpui turin a hriattir niin an tarlang.

African team-te age level-ah che ṭha ṭhin mah se, senior-ah beisei an phak lo ṭhin a, hei vang hian kum inziah naupang chungchangah African team-te hi dem an lo ni fo tawh ṭhin.

Kum 2009 khan FIFA Under-17 World Cup-ah FIFA chuan MRI scan a hmang ṭan a, hemi ṭum hian Nigeria-ah inelna hi neih a ni - MRI hmang hian mihring ban ruhrel chu an scan a, heta ṭang hian an kum zat awm ang chu a hriat theih a ni.

FECAFOOT hian kum 2017 khan AFCON U17-ah an player 14 ngawt chu test an paltlang loh avangin an lo inkhelhtir lo tawh a, an tan thil thar lutuk a ni lo.

Barcelona leh Inter Milan-a hming lo chher tawh Eto'o hian December 2021-a FECAFOOT President atana thlan a nih khan, kum dik loa inkhel tam lutuk chu thaibo tura hma a lak tur thu a lo sawi tawh.

Cameroon national broadcaster CRTV journalist Simon Lyonga chuan, "Cameroon mipuite chuan he hmalakna hi an thlawp takzet a, kum dik taka khel turte tana chance siam hi a ṭul em em a ni," tiin Eto'o chu mipuiin an thlawp thu a sawi.

African football-a hming langsar pawl ni reng ṭhin Cameroon hi kum 2003 leh 2019 khan AFCON U17-ah an lo champion tawh.