Copa del Rey: Round of 16 lut a hriat kim

Spanish football inelna ngaihhlut hlawh, Copa del Rey round of 16 lut tur a hriat kim ta a, nizan khan round of 32 chu khelh zawh a ni.

Club langsar Atletico Madrid, Barcelona leh Real Madrid te chuan last 16 an lut vek a, nizan khan Real Betis leh Athletic Bilbao chuan anni ho hnung hi an rawn zui ve leh ta.

Real Betis hian CD Ibiza Islas Pitiusas chu harsatna nei loin 4-1 in an sawp a, fourth division club Pitiusas tan Pepe Bernal chuan goal hmahruai khung ve zuk mah se Betis hian Willian José goal hnih, Edgar González leh Nabil Fekir goal hmangin an chhanglet a, an chak.

Nizan inkhel ngaihven hlawh dangah Athletic Bilbao chuan 6-1 in Eldense an hneh bawk.