Kerala lakah Mizoram an zawr

Santosh Trophy vawi 76-naah Mizoram an mualpho a, nimin tlai khan Kerala lakah 5-1 in an chak lo. Champion lai leh inelna thlengtu Kerala hian goal nga an khung a ni ringawt lo a, goal khung theihna chance ṭhahnem tak an hlah bawk.

Nikum khan Mizoramin group match hnuhnung berah Imphal khawpuiah Manipur 0-1 a hneh loin final round an thleng zo lo a; kumin inelnaah Kerala chiang taka an hneh loh avangin insiamṭhatna tur ṭhahnem tak a awm tih a chiang.

Mizoram tana chanchin lawmawm erawh pahnihna ni chungin final round a khelh theih a, Samson Ramengmawia hote hian an group-a an khingpui dang Jammu & Kashmir, Rajasthan, Bihar leh Andhra Pradesh te an hneh vek avangin beiseina sang tak an nei.

Mualphona
Kozhikode-ah Mizoram leh Kerala ten hmahruaitu nih an inchuh a, an fimkhur dun a; captain captain Lalrinchhana Tochhawngin crossbar a pet per a, amaherawhchu Kerala-in chanchin ngaihnawm an ngah zui ta zawk.

Minute 30-naah keeper F. Lalmuanawma tihsual chu Naresh Bhagyanathan-a'n rang zetin a kheng lut a, first half goal a luh belh lo.

Second half ṭan chiahah freekick aṭangin Nijo Gilbert-a'n mawi zetin goal kilah a pet lut.

Kerala-in Mizoram an ngam sawt a, Mizo player panga zet an awm chungin Naresh-a'n box pawn aṭangin goal kilah a pet lut - minute 66-naah 3-0 a ni. Mizoram an mualpho zui zel, Kerala-in awlsam takin Mizo player-te an bum a, minute 76-naah Gifty Gracious-a'n goal lina a khung.

Substitute Malsawmfela'n freekick aṭangin minute 80-naah mawi zetin a pet goal a, mualpho hliah khuhna a ni phak lo. A chhan chu minute 85-naah Vishak-a'n Kerala goal ngana a khung a, mualneituin 5-1 in hnehna an chang.

Kerala-in match nga an khelhah hnehna an chang a, team pathum Rajasthan, Mizoram leh Andhra Pradesh lakah goal nga an khung tling.

Engtin zel?
Santosh Trophy-ah hian team 36-in first round khelin group parukah paruk zelin ṭhen an ni.

Group hmahruaitu zelin final round an lut dawn a; Delhi, Kerala, Goa leh Meghalaya-te group hmahruaitu niin an tling. Group tina pakhatna bakah hian Railways leh Services-te an tling sa bawk.

Group-a pahnihna zinga a tiṭha pathum an tling tel dawn a; Group IV leh group VI-te an la khelh mek avangin group pahnih dinhmun hi a la chiang lo.

Group I-a pahnihna Karna-taka chuan Mizoram ang thoin point 12 hmu mah se an goal difference a ṭhat zawk avangin an tling chiang tawh.

Mizoram hi group danga pahnihna Nagaland (11 pts) leh Odisha (10 pts) aiin an dinhmun a ṭha zawk a, amaherawhchu group IV leh group VI ten an khelh zawh phawt loh chuan an hmalam hun a la chiang lo.

Hetihlai hian Mizoram tana thu lawmawm a awm - final round-ah hian inelna thlengtu an tling nghal dawn a, inelna thlengtu ni tura ngaih (la tihchian loh) Delhi chu an group-ah pakhatna a ni. Delhi hian final round hi an thleng a nih chuan group IV leh group VI-a pahnihna te hi Mizoram aiin che ṭha zawk mah se Mizoramin final round an khel tho ang.