Tlai dar 4:30-ah Aizawl FC Vs Real Kashmir

Aizawl FC chuan vawiin tlai dar 4:30 hian RG Stadium-ah Real Kashmir an mikhual dawn. I League khelh mekah Mizo club hi pariatnaah an ni a, an khingpui tur Real Kashmir hi pathumnaah an awm thung.

Wadoo naute
Real Kashmir hian India international defender hlui Mehrajuddin Wadoo kaihhruaina hnuaiah season bul an ṭan ṭha a, amaherawhchu match hnuhnung pathuma an chak lo vek avangin an insiamṭhat an mamawh hle.

Kum 38 mi Wadoo chuan, "Player nih lai chuan coach hi hna awlsamah ka ngai ṭhin a, a awlsam lo - a harsa takzet. Match hnuhnung pathumah pawh kan khel chhe lo a, amaherawhchu tihsual kan nei thung.

"Thlasik chawlh kan hman hnuin training ṭha tak kan nei leh tawh a, kan tihsual laite kan siamṭha tawhah kan ngai. Chak ngei tumin Aizawl hi kan rawn kal a ni," tiin Vanglaini a hrilh.

Real Kashmir hian RoundGlass Punjab an hneh loh ṭumin player pawimawh Ghanaian defender Moro Lamine chu hnawhchhuah a ni a, Mohammedan an hneh loh ṭumin midfielder Yakubu Wadudu hnawhhchhuah a ni leh bawk. Match hnuhnung pathuma Real Kashmir chak loh chhan hi an chesual laklawhah a ngaih theih a, Aizawl FC tan zuam ngawt a rem lo ang.

AFC an inpeih
Aizawl FC-in match hnuhnung berah Rajasthan FC an hneh lo a, hemi ṭum hian an khingpui team hian inkhelhna tur Dr. Ambedkar Stadium-ah training an remtih sak lo.

Mizo club coach Caetano Pinho chuan, "Stadium chei ṭhat a nih avangin training a theih loh thu min hrilh a, anni erawhin training an nei thung. An chet dan avangin club hotute pawh an lawm lo a, AIFF-ah lungawi loh thu an thlen," tiin Vanglaini a hrilh.

Inkhel tur chungchang sawiin Caetano chuan, "Training kan nei ṭha a, kan dam ṭha. Real Kashmir hmachhawn turin kan inpeih a, chak ngei pawh kan inbeisei," tiin a sawi. Aizawl FC hian Caetano hnuaiah hian Rajasthan FC 1-0 in hneh lo mah se hemi hma chiah hian Kenkre 4-0 in an hneh.

Aizawl FC hian season bul ṭan ṭha lo mah se tunah erawh an insiamrem chho a, team ṭha zinga awm thei tur an ni. Chutihrualin Mizo club hian team ṭha zinga awm an duh a nih chuan Real Kashmir hi an hneh ngei a ṭul a, Mizo mipui thlawpna an mamawh bawk.