AIFF-in Vision 2047 an tlangzarh

All India Football Federation chuan hmathlir thar ber Vision 2047 chu Inrinni khan Delhi-ah an tlangzarh. Kum 2047 an thlan chhan hi India-in zalenna a hmuh kum 100-na tur chiah a ni a, Asian football ram ṭha zinga tel phak an tum a ni.

AIFF president Kalyan Chaubey chuan, "Kan ramin zalenna a hmuh kum 100-naa India awmna tura kan duh atana ruahmanna a ni. Kum 1950 leh 1960 chhoa Indian Football ropuina tihnun thar chu ka duhthusam a ni a, Asian football thununtu nih leh kan duh. Beiseina nei turin dikna kan nei a, kan beiseina tih hlawhtlin hi kan hna a ni. Kan thawhhona a ṭhat chuan Indian football-in a la thlen ngai loh kan thleng thei ang," tiin ruahmanna thar chungchang a sawi.

Kum 2047 thleng turin kum 24 a la awm a, hei hi hmun liah kum ruk zelah an ṭhen. India-in zalenna a hmuh kum 100-na a thlen hunah chuan player-ten season khatah inelna hrang hrangah match 55 khel turin ruahmanna an siam.

Chutihrualin ruahmanna hmasa hi chu kum 2026 thleng a ni a, hetah hian AIFF chuan khaw 100 chuangah naupang maktaduai 35 football zirtir an tum. Football league pawh tun aia changtlung zawka ruahman tum a ni a, team 40 chu league pathumah ṭhensawm a ni ang.

Hero Indian Super League leh Hero I League-ah team 14 ve ve an awm ang a, 2nd Division I League-ah team 12 an awm ang a, league pathumah team 40 an awm chiah ang. Tun dinhmunah ISL leh I League-ah team 11 leh 12 an awm a, inelna ang pahnihah hian team tih tam ve ve tum a ni. Heng bakah khelmual chhung leh pawnah ruahmanna ṭhahnem tak a awm bawk.