Djokovic tan nomawi

Novak Djokovic chuan season bul a ṭan fuh, nimin tlaia khelh zawh tak Adelaide International final-ah Sebastian Korda 6-7(8), 7-6(3),6-4 in a hneh a, tennis a khelh hun chhunga a nomawi 92-na a chawi.

Center Court-a inkhelah Djokovic hi a che fuh mai bik lo, set khatna a hloh bakah set hnihnaah pawh a dinhmun a him lo. Mahse, hun harsa laiah player ṭha bik a nihna lantirin, a khingpuiin match point a hmuh tawh chu a inchhanhim.

Set hnuhnung berah pawh player pahnih an inkhel tawk hle, amaherawhchu vawi khat tih sual zauh pawina kan hmu. A vawi hnih nan Djokovic hian a khingpui service a chhuhsak a, ama service hum zuiin a champion ta zawk.

Serbian star Djokovic chuan, "Ka tan chuan chawlhkar nuam leh hlimawm tak a ni. He hmunah hian min thlawptu an awm ṭha ṭhin a, kuminah pawh ka chakna hnar an ni," tiin a sawi.

Djokovic tan chuan Australia hi tennis khelhna hmun nuam leh ṭha bik a ni, season tir lama tennis inelna lian awmna ramah hian a zawnin match 34 a chak tling ta. Tun thla chawhnu lama khelh tur Australian Open-ah pawh rinkai ber a ni dawn.