Man United-in Weghorst an dawr

Manchester United-in striker an zawng a, thlasik bazara an lak tum chu Burnley leh Netherlands striker Wout Weghorst a ni. Dutch striker Weghorst hi Turkish club Besiktas-ah loan hmangin a khel mek a, match 16-ah goal riat a khung.

Kum 30 mi Weghorst hian Inrinni khan Kasimpasa lakah goal a khung a, 2-1 in an chak. Dutch forward goal khung lawm danah hian Besiktas ṭantute a mangṭha niin a lang.

Man United manager Erik ten Hag-a'n Cristiano Ronaldo chhuah vangin striker lakluh a tum thu a sawi lang fo a, amaherawhchu sum hman tur a tam loh avangin duh thlang thei an ni lo.

Weghorst hian nikum January khan Wolfsburg aṭangin Burnley a zawm a, goal hnih chauh khungin Clarets hi Championship-ah an tla. Chutihrualin World Cup quarterfinal-a Netherlands-in Argentina an hneh loh ṭumin goal hnih a khung a, a lar phah hle.

United hi Joao Felix leh Memphis Depay te nen sawizawm ni mah se player pahnih lalut tur hian sum sen tam a ṭul a, hei vang hian player man tlawm zawk an zawn a ṭul.

Khawtlang media ṭhenkhatin United hi Vincent Aboubakar nen an sawizawm a, hei erawh thuthang mai chauh a ni. Al-Nassr-in Ronaldo an lalut a, foreign player pariat chauh an ziahluh theih avangin Cameroon captain Aboubakar contract hi an titawp.

Kum 30 mi Aboubakar hi United nena sawizawmtu awm bawk mah se journalist rintlak zawkten English club-in an dawr loh thu an ziak.