Smith Rowe a dam fel tawh - Arteta

Arsenal manager Mikel Arteta chuan Emile Smith Rowe a dam tawh tih a sawi a, zanin dar 1:30-a Oxford United nen FA Cup third round an khelh hunah England international hi a inlan ngei a rinawm.

Kum 22 mi Smith Rowe hian season hmasa kha a hmang ṭha hle - Premier League goal 10 a khung. Mahse, tun season-ah erawh khel bawr hliam vangin a buai, bench aṭanga vawi li a luh bak chu a la inkhel lo.

Arteta chuan, "A pawimawh hmasa berah chuan 100%-in inkhel tura a inpeih a ngai, ani ang inkhel tura a lo kir thei tur hi chanchin lawmawm a ni, hun rei tak chhung chu tun ang hun hi kan lo nghak tawh.

"FA Cup kan khelh hmain training vawi khat kan la nei dawn, chumi hunah chuan harsatna a nei lo a nih chuan match pangngai a khelh theih ngei ka beisei. Emile hi chu attacking midfielder a ni a, winger atan bakah number 9 atan pawh a hman theih," a ti.

Arsenal hian Premier League-ah point 44 hmuin hma an hruai mek, champion lai leh anmahni hnaih bertu Manchester City nen an inkarah point nga a awm. League bakah FA Cup khelh tur a awm avangin squad siksawi a ngai dawn.

Arteta chuan, "Oxford United inkhel hi kan zirchiang tawh, an khelh dan phung an thlak fo avangin hmachhawn pawh an awlsam dawn lo. Kan tan chuan fiahna hautak zinga mi a ni ngei ang," tiin a sawi.