FA Cup - Liverpool an chak zo lo

"Cup inelna ropuina chu eng pawh a thleng thei hi a ni," tiin an sawi ṭhin a, FA Cup-ah pawh he thusawi dikna hi hmuh turin a awm - Liverpool chu an mikhual Wolverhampton Wanderers lakah an chak zo lo a, 2-2 a an inhnehtawk avangin replay an khel dawn.

Reds tan goalkeeper Alisson a chesual a, Brazilian keeper hian minute 26-na lekah Gonçalo Guedes goal khung tur a 'khilai'.

Liverpool-in Darwin Nunez leh Mohamed Salah hmangin chhanglet mah se, Hwang Hee-chan chuan goal khat khung ve lehin, 2-2 in inkhel a tawp - Wolves tana Toti Gomes goal khung pawm loh chu Liverpool-in an vanneihpui takzet.

Premier League-a thawnthu ngaihnawm ziak mektu Newcastle United-in beisei an phak lo a, Sheffield Wednesday khelmualah 2-1 in an tlawm - League One club tan Josh Windass chuan goal khat a khung a, Magpies tana Bruno Guimarães goal khungin awmzia a nei lo.

Reds an hah dawn!
Liverpool-in Wolves mikhualin, Anfield-ah bul ṭan ṭha viau mah se an goalkeeper chhuanvawr Alisson a chesual a, Trent Alexander-Arnold hnena a ball pek tum chu Goncalo Guedes zawk a pe a, Portuguese forward hian Anfield a ngawihtir.

Reds tan Darwin Nunez chuan minute 45-naah class zeta volley-in si phurh sutna goal a khung a, Salah chuan minute 52-naah a belhchhah bawk - an chak leh mai dawn niin a lang hman. Mahse, minute 66-naah Hwang Hee-chan chuan Wolves tan a khung ve leh a, 2-2 in inkhel a tawp.

Wolves tan Toti Gomes chuan chakna goal a khungah inngai mah se linesman-in offside a phar a, pawm a ni lo. VAR hmangin ennawn ni mah se, ball thlawh luttu Matheus Nunes offside leh offside loh en turin VAR camera angle lamin a la fuh tawk lo a, goal-ah an pawm loh phah. Wolves boss Julen Lopetegui chuan, "Thutlukna dik lo a ni.

"Keipawhin tihsual ka nei ṭhin a, anni pawhin an nei ṭhin - VAR kan nei tawh a, a pawi takzet. Offside a ni lo," a ti a, Reds manager Jurgen Klopp chuan, "Sawi thiam a harsa - ka thlalak neih pakhatah chuan an offside ngei. Mahse, an thinrimna ka hriatthiampui a, VAR hian angle khat chauh a la tur a ni lo," a ti.

Magpies an tlawm
Newcastle United-in Premier League-ah beisei phak baka ṭhain season an hmang a, league table-a pathumna dinhmun luah mektu club hian FA Cup-ah erawh League One club an ngam lo!

Magpies hi Sheffield Wednesday khelmualah an lenglut a, English third division club hian 2-1 in an lo hneh - first half-ah goal lut lo mah se Josh Windass chuan second half-ah goal hnih a khung a, minute 65-naah 2-0 a ni.

Newcastle tan bench aṭanga luhtir Guimarães chuan khelmual a luh aṭanga minute kuanaah goal a khung a, mahse, a team erawh a 'comeback' pui zo ta chuang lo.

Sheffield manager Darren Moore chuan, "Ka career-a ka result duhawm ber zinga mi a ni," tiin Magpies an hneh chu a lawm thu a sawi a, club pahnih dinhmun khaikhinin a awm lo hran lo.

Inkhel dang
Premier League team talbuai AFC Bournemouth-in FA Cup hmangin an fan-te thinlung na thawidamna remchang nei mah se an chhawr lo a, Burnley lakah 4-2 in an tlawm.

Burnley tan Anass Zaroury leh Manuel Benson ten goal hnih ve ve an khung a, Bournemouth tan Ryan Christie leh Dominic Solanke ten goal khat ve ve khung ve mah se, awmzia an nei phak lo.

Team 24 inelna Championship table-a 22-na ni mek Blackpool-in Premier League club an hre lo a, Nottingham Forest chu 4-1 ngawtin an lo sawp.

Blackpool tan Marvin Ekpiteta, Ian Poveda, CJ Hamilton leh Jerry Yates ten goal khat ṭheuh an khung a, hun pek belha Ryan Yates goal khung chu an match hnuhnung ber aṭanga starting XI thlak danglam hlawktu Forest tan mualpho zualpui khuhna chauh a ni.

Foxes an chak
Premier League-a season hmang fuh lo tak Leicester City tan chak turin goal khat khung a tawk a, League Two club Gillingham chu khualmualah 1-0 in an hneh.

Foxes tan Kelechi Iheanacho chuan inkhela goal awmchhun hi a khung a, Krismas hnua inelna hrang hranga Foxes an chak hmasak ber a ni.

Premier League club pahnih inkhelah Southampton chuan 2-1 in Crystal Palace an hneh a, Palace tan Odsonne Edouard chuan goal hmahruai khung mah se Saints hian James Ward-Prowse leh Adam Armstrong hmangin an chhanglet.

League lama Tottenham-in 4-0 a an sawp hlim Palace tan result duhawm lo a ni a, Premier League-a an match hnuhnung pasariha chak nei lo Saints erawh he result hian phurna nasa tak a pe ang.