Deschamps-a'n France a enkawl chhunzawm dawn

World Cup 2022 zawh ruala contract hmang zo Didier Deschamps chuan France-a cham chhunzawm turin contract thar a ziak leh ta a, June 2026 thleng France hi a enkawl dawn avangin a vawi li nan Les Blues hi World Cup-ah a kaihruai thei dawn tihna a ni.

Kum 54 mi Deschamps hian kum 2012 khan France enkawl hna hi a thawk ṭan a, World Cup 2014-ah quarterfinal chiah hruai thleng mah se, 2018-ah champion nomawi a chawipui a, 2022-ah final a luhpui bawk.

Euro 2016-ah final a hruai thleng a, Euro 2020-ah round of 16 aṭangin an tla thung. Nations League 2021-ah France hi champion nomawi a chawipui a, coach a nih anga a la champion lohna Euro-ah champion puina chance a la nei leh dawn.

Player a nih laia World Cup leh Euro-ah pawh champion tawh Deschamps hian an ram team hi match 139-ah kaihruaiin, vawi 89 hnehna a chanpui a, vawi 28 draw result neiin, vawi 22 a tlawm - a record hi a chhuanawm hle.

France Football Federation chuan Deschamps bakah hian assistant coach Guy Stephan, goalkeeping coach Franck Raviot leh physical trainer Cyril Moine pawh an chelh thu an puang.

Deschamps-a hna hmasa tur chu Germany-a khelh tur Euro 2024-a France tlinpui phawt a ni ang a, USA, Canada leh Mexico te inthlen ṭawm tur World Cup 2026-a a team hruai thlen lam a ngaihtuah a ṭul bawk ang.