Spurs tan Kane-a goal a tawk

Harry Kane chuan Tottenham Hotspur tana goal khung hnem ber ni turin goal khat chiah a mamawh ta. Kane hian a club tan goal 265 a khung ta a, North London club tana khung hnem ber Jimmy Greaves a phak lohna chu goal khat chauh a ni - a khum ngei ang.

Inrinni zan FA Cup third round inkhelah Tottenham hian Kane-a goal khat hmangin Portsmouth 1-0 in an hneh. Goal awmchhun hi Kane-a'n Ryan Sessegnon nen ball an inpek hnuah mawi zeta a thlawh luh a ni.

England international hian club record siam turin hun ṭha a nei. January 15 hian Arsenal nen North London Derby an khel dawn, an hmelma club laka record siam theih chu duhthusam a ni ngei ang.

Kane hian goal khung thei viau mah se nomawi a la chawi lo. Tottenham manager Antonio Conte-a'n nomawi chawi khat tak club hi title lakpui ngei a tum tih a player thlan danah a lang chiang bawk.

Dejan Kulusevski, Richarlison leh Lucas Moura te an hliam mek, a bik takin tlarhma player an hliam belh a hlauhawm hle. Heti chung hian Kane leh Son Heung-min ten inkhel bul an ṭan a, chak ngei ngei an tum tih a chiang.

An tum ang ngeiin Portsmouth an hneh. Conte naute hian League Cup 2008 hnua a vawi khat nan nomawi eng emaw ber tal chawi an tum dawn a ni.