Ten Hag hnuaiah United che ṭha zel

Manchester United chuan Zirtawpni zan khan FA Cup-ah Everton chu 3-1 in an hneh. Erik ten Hag-a hote hian FA Cup bakah Europa League leh League Cup-ah nomawi beiseina an la nei bawk. January 10, Thawhlehni zan hian League Cup quaterfinal-ah Charlton Athletic an mikhual lehnghal ang.

Old Trafford-ah Marcus Rashford a che ṭha chhunzawm a, minute lina lekah mual vei lam aṭanga a cross ṭha chu Antony-a'n goal-ah a chantir. Everton-in minute 14-naah siphurh an sut a, David de Gea a mualpho. Neal Maupay cross hlauhawm lo zet chu De Gea hian a kap karah a chhuah a, Conor Coady-a'n goalline bul aṭangin a pet goal.

Man United an khel chhe lo a, chutihrualin Toffees forward Demarai Gray chu a hnawksak hle. Mualneituin minute 52-naah hma an hruai nawn a, Rashford-a cross chu Coady-a'n an lamah a tilut. Toffees an khel chhe lo a, Dominic Calvert-Lewin-a'n siphurh sutah inngai mah se ball petu Gray a offside - VAR hmanga enlet hnuah pawm a ni lo.

Argentine rawlthar duhawm Alejandro Garnacho-a'n hun pek belhah penalty a hlawh chhuak a, Rashford-a'n ama pualin goal a khung. Man United-in 3-1 in hnehna an chang. Ten Hag chuan, "A ke chhe lam leh ball kangah hmasawn a ngai a, a bakah chuan a ṭha khawp mai. Hma a la sawn zel thei ang," tiin Rashford chungchang a sawi.