Australian Open khel lo tur an hrawl

Mipa tennis world number 1 Carlos Alcaraz chuan Australian Open a khel thei dawn lo tih a chiang tawh, hmeichhe lamah pawh vawi hnih champion tawh Naomi Osaka bakah wildcard hmanga inlan tur Venus Williams chu a inkhel ve thei dawn lo.

Tennis season khat chhunga Grand Slam hmasa ber - Australian Open 2023 hi January 16 aṭangin khelh a ni dawn. Alcaraz hi inlan tum mah se, season thar inbuatsaihna an neih laiin a ke a hliam a, a dam hman dawn lo a ni.

A tira ruahman dan chuan Alcaraz hi Kooyong Classic pawh khel tur a ni. Mahse, Alcaraz chuan, "Season thar inbuatsaihna kan neih lai khan nuam ka ti a, ka ṭhat dan berin ka khel thei ngei dawn ni pawhin ka hre hman.

"Mahse, vanduai thlak takin ka ke a hliam a, duhthusamin ka chet a la nuam lo. Kooyong Classic bakah Australian Open ka khel thei dawn lo, thutlukna siam harsa leh hrehawm tak chu a ni, nakkumah Melbourne Park-ah kan inhmuh theih ka beisei," tiin a sawi.

Kum 19 mi Alcaraz a inlan theih loh chuan, amah ang bawka Spanish player Rafael Nadal chu seeded pakhatna a ni thei dawn. Nadal hi hliam leh harsatna dang a awm thut a nih loh chuan a inlan ngei a rinawm.

Australian Open chuan nimin khan Naomi Osaka a inhnukdawk tih an puang a, tournament a khelh theih loh tur chhan hi chiang taka tarlan a ni lo thung - vawi hnih a champion tawhna hmunah a hmel kan hmu dawn lo.

Osaka hian rilru lam harsatna a neih hnuah ngai a la awh leh thei lo. Nikum September thla hnu khan a la inkhel leh lo, tun hnaiah a bialpa US rapper Cordae nen an chhuah dunna hmuh tur a awm a, a taksa dam mah se tennis khelh lam chu a la ngaihsak lo tih a lang.

Venus Williams pawh duhsak takin wildcard pek a ni a, amaherawhchu inbuatsaih nana a khelh ASB Classic-ah a inhliam. American star hi Australian Open atan a inpeih hman dawn lo tih a chiang tawh.

Simona Halep chu damdawi hman phal loh a hman leh hman loh chungchang chhui mek a ni, hei vang hian Australian Open a khel thei dawn lo. Tun dinhmunah world number 1 Iga Swiatek leh Emma Raducanu te chu hliam vangin an dinhmun a chiang lo mek bawk.

Swiatek hi Adelaide International-ah a inlan a, a dar hliam vangin inelna a hmachhawn zui thei tawh lo. Tournament lian khelh hmain chawlhkar khat chiah a awm tawh, ngaiawh turin hun a nei tlem hle.