Ball 45 lekah century siamtu SKY

India-in Sri Lanka laka T20 series la turin Inrinni zan khan 91 runs-in hnehna an chang a, Suryakumar Yadav chuan ball 45 lekah century a siam.

SKY hminglem an vuah Suryakumar Yadav hi a lar chhuak har a, March 14, 2021 khan India tan T20-ah a khel ṭan chauh. Men in Blue tana a khelh hmasak ber ṭum hian SKY hi kum 30 mi a ni tawh a, ram tan khel tlai mah se sulhnu erawh a ngah tawh hle - T20 batting ranking-a no. 1 ni lai a ni.

Kum hnih pawh tling loah SKY hian T20-ah India tan match 45 a khel a, 1578 runs tehmeuh siam tawhin batting average pawh 46.56 runs a ni pha. India tan T20-a century siam tam ber chu Rohit Sharma a ni a, vawi li a siam tawh - SKY hian century vawi thum a siam tawh thung.

Saurashtra Cricket Association Stadium-ah Men in Blue leh Lions-in T20 match thumna an khel a, a chak zawkin series an la dawn. Mualneituin bat hmasak an thlang a, Shubman Gill (46) leh Rahul Tripathi (35) te hmangin bul an ṭan ṭha.

SKY-a'n ball 51-ah thi loin 112 runs a rawn siam a, India hian over 20-ah 228/5 runs an siam avangin Sri Lanka tan umphak rual a ni lo. Mikhual team hian over 16.4-ah 137 runs an siam a, an thi fai vek. India-in series an lak theih nana player pawimawh Axar Patel chu player of the series-a thlan a ni.