La Liga-ah Real Madrid an tlawm

Real Madrid-in La Liga hmahruaitu nihna hun ṭha nei mah se Villarreal lakah 2-1 in an tlawm a, penalty vawi hnih petna inkhelah a goal khung tlem zawkah an ṭang.

Mualneitu Villarreal tana Yeremy Pino-a goal hmahruai khung chu Real tan Karim Benzema chuan penalty hmangin a chhanglet a, mahse, Gerard Moreno chuan penalty hmanga khung ve lehin, 2-1 in an chak daih.

Real hian hnehna chang se chuan match khata khel tlem zawk Barcelona tlan pelin, point thumin an sang fal ang a, nizana Catalan club leh Atletico Madrid inkhelah Barca-in pressure an nei ngah sawt bawk ang.

Mahse, Carlo Ancelotti leh a nauten an chance neih an chhawr thei lo a, khualmualah an tlawm - La Liga champion tum inum boruak a sang zel dawn e.

Inkhel hmuhnawm
Villarreal khelmualah team pahnih an inhlau lo tawn a, chak an tum ngam ve ve - Estadio de la Ceramica-ah Villarreal-in inkhel an thunun zawk a, an vanneih zan ni se first half-ah goal an khung nual ang.

Spanish winger Alex Baena-a'n Viallrreal tan chance duhawm nei nual mah se goal hmaah a vannei tawk lo a, Francis Coquelin chuan backheel hmangin uiawm takin post a tih per bawk.

Real-in chance nei lo an ni bik lo. Mahse, Benzema-a'n Vinicius Jr tana a siamsak duhawm tak chu Brazilian forward hian goal-ah a chantir thei lo a, keeper tawnhriat nei ṭha Pepe Reina chuan ṭha zetin a dansak.

First half chhungin team pahnihin goal an khung thei lo ve ve a, goal an chhuah loh avanga lawm zawk tur an awm a nih chuan Real Madrid an ni - an vannei.

Goal thum
First half-ah goal lut lo mah se second half-ah erawh goal hmu turin nghah rei a ngai lo - khelmual an luh leh aṭanga minute hnihna lekah Ferland Mendy-a ball pet sual chu Dani Parejo chuan lo changin, Moreno a pe leh a, Spanish striker hian Pino tan siamsakin goal-a chantir a harsa tawh lo.

Real-in an chetsual vangin goal an chhuah a, si phurh sut a harsa tawh dawn tih an hria. Mahse, minute 60-naah Real an vannei a, referee-in Juan Foyth 'handball' sawisel theih tak hmangin Real hi penalty a pe.

Karim Benzema chuan penalty hi goal-ah a chantir a, tun season league match kua a khelha goal riat a khungna chiah a ni - La Liga-ah hian match 424 khelin goal 227 a khung tawh.

Benzema hian La Liga-a goal khung tam lamah amah ang thoa Real legend Alfredo Di Stefano a nih rual chiah a, La Liga goal khung hnem parukna a ni - a chungah Raul Gonzalez (228 goals), Hugo Sanchez (234), Telmo Zarra (251), Cristiano Ronaldo (311) leh Lionel Messi (474) chiah an awm tawh.

Real & sulhnu
Karim Benzema goal khung hnuah Real an phur sawt a, an phur chhung erawh a rei lo - si phurh an sut aṭanga minute thum hnu lawkah sawisel theih tak thoin penalty an chawi.

David Alaba chuan tlu chungin Foyth-a ball pet chu a kutin a tawk fuh palh a, dan ang chuan handball lo tur niin lang mah se sawisel theih taka Real penalty pe tawhtu referee-in a hawisan ngam lo.

Penalty spot a kawk a, Moreno chuan Villarreal tan goal-ah chantirin, 2-1 in an chak. Real an tlawm a, an tlawm zan hian an club chanchina a vawi khat nan starting XI-ah Spanish player an awm miah lo bawk.

Real tan hian France mi pathum Aurelien Tchouameni, Mendy & Benzema, Brazilian pahnih Vini & Eder Militao, German pahnih Antonio Rudiger & Toni Kroos, Croatian pakhat Luka Modric, Belgian pakhat Thibaut Courtois, Austrian pakhat David Alaba leh Uruguayan pakhat Valverde ten bul an ṭan a ni.