Chelsea-in Fofana leh Santos an lalut

Premier League club Chelsea chuan striker leh midfielder thar an nei a, Ivory Coast striker David Datro Fofana chu Molde aṭanga lalutin, Brazilian midfielder Andrey Santos chu Vasco da Gama aṭangin an lalut bawk.

Kum 20 mi Fofana manah hian Blues hian pound maktaduai 8-10 inkar an seng nia sawi a ni a, kum ruk atan contract ziakin, Stamford Bridge-ah kum 2029 thleng a cham dawn - a ṭul dan a zirin kum khat dang pawhsei theih a ni.

Norwegian champions Molde tan match 65-a goal 24 khungtu Fofana chuan, "Ka duhthusam club tana contract ka ziak thei hi ka lawm hle," a ti a, Chelsea chuan an striker thar chu, "European football-a player ṭhangduang ber pawl," tiin an sawi ve bawk - Ivory Coast tan match thum a khel tawh.

Kum 18 mi Andrey Santos manah Blues hian pound maktaduai 18 an seng nia sawi a ni a, Brazilian second division club Vasco da Gama tan match 38-ah goal riat a khung tawh - Serie A an kir theih nana player pawimawh a ni.

Brazil Under-20 international chuan, "League ropui tak Premier League-a club langsar tak ka zawm thei a, ka hlim takzet a ni," a ti - Blues hian France defender Benoit Badiashile chu AS Monaco aṭangin £35mtd-in an lalut tawh bawk a, January-ah player pathum an lalut tawh.