A zawna match riat chak thei Juve

Juventus chuan season bul ṭan fuh lo mah se an insiamṭha tawh a, tun hnaiah a zawnin Serie A match riat an chak tliang ta. Old Lady hian Inrinni zan khan an mikhual Udinese chu 1-0 in an hneh.

Allianz Stadium-a inkhelah goal erawh kan hmu har hle, hun tawp hma minute li chauh awm tawhah Danilo chuan Federico Chiesa siamsak a khung a, he goal hi point thum hlawh chhuah nan a tawk.

Massimiliano Allegri naute hi table-ah pahnihna an ni der tawh a, hmahruaitu Napoli an phak lohna chu point li a ni - match khatin an khel hnem thung. Tun kar tawpah team pahnih hi an intawng dawn, a hmuhnawm ngei ngei ang.

Inter Milan erawh Monza lakah an chak zo lo, 2-2 in an inhnehtawk. Matteo Darmian leh Lautaro Martinez te hmangin vawi hnih hma hruai mah se, mualneitu Monza lamin Patrick Ciurria leh Luca Caldirola ten an sut ve ve.

Nizan khan champion lai AC Milan leh AS Roma an inkhel. Milan hi an chak a nih chuan Juventus nek chhuakin pahnihna dinhmun an luah leh zawk ang.