Odisha-in East Bengal an hneh

Inrinni zan khan Indian Super League inkhelah Odisha FC chuan 3-1 in East Bengal an hneh a, Kolkata club tan Cleiton Silva chuan goal hmahruai khung mah se, mualneitu Odisha hian Diego Mauricio goal hnih leh Nandhakumar Sekar goal khat hmangin an chhanglet a, 3-1 in an chak daih.

Odisha tan Jerry Mawihmingthanga'n bul ṭanin, Isaac Vanmalsawma chu bench aṭanga luhtir a ni a, Jerry hian goal khungna chance a neih a chhawr lo - East Bengal tan Lalchungnunga leh Jerry Lalrinzuala te an khel tluan bawk.

Inrinni zan inkhel hmasa zawkah Jamshedpur leh Chennaiyin te 2-2 in an inhnehtawk bawk. Men of Steel tan Ritwik Das chuan goal hnih khungin, 2-0 in hma an hruai a, mahse, Chennaiyin tan Vincy Barretto leh Petar Sliskovic ten chhangletin, point an insem.

JFC tan Ricky Lallawm-awma, Laldinliana Renthlei leh Laldinpuia Pachuau ten bul ṭan mah se, an team an chakpui zo lo a, top four beiseina a bo tawh tiin a sawi theih - Chennaiyin tan pawh semifinal lut tur chuan thil mak a thlen tel a ngai tawh ang.

Zirtawpni zan khan Northeast United an tlawm leh ta bawk a, Bengaluru chu 2-1 in an ngam lo. South Indian club tana Sivasakthi Narayanan goal hmahruai chu Romain Philippoteaux chuan Highlander tan a chhanglet a, an inhnehtawk mai dawn niin a lang.

Mahse, hun pek belh minute linaah Bangalore club tan Alan Costa chuan goal khat khung ve lehin, goal dang luhna hun a awm tawh lo a, mikhual Bengaluru an chak.

Highlander tan Rochharzela'n inkhel bul ṭanin, Emanuel Lalchhanchhuaha leh R. Laldanmawia te chu bench aṭanga luhtir an ni bawk.