Aizawl FC leh Real Kashmir an inhnehtawk
Nimin khan RG Stadium-ah Aizawl FC-in Real Kashmir an mikhual a, goal awm loin an inhnehtawk. Mizo club-in point khat an hlawhchhuah avangin pasarihnaah an inhlangkai a ni.
Aizawl FC hian January 13, Zirtawpni tlaiah Mohammedan SC chu khualmualah an hmachhawn ang. Real Kashmir hian January 12, Ningani hian Sudeva Delhi an hmachhawn bawk ang.
Mizo 10
Aizawl FC coach Caetano Pinho-a'n bul ṭantu player 11 zingah Mizo pakua a dah lut. Tlarhmaah Henry Kisekka a mal tlat a, defence laia captain Lalchhawnkima dinpui turin Japanese defender Akito Saito a thlang.
Mizo player 10-na hi Real Kashmir tan a khel thung a, Lunglei tlangval Lalnuntluanga Bawihtlung chu midfield lai luahlumtu a ni. Tluanga hi AIFF Elite Academy aṭanga inzir chhuak a ni a, nikum Santosh Trophy-ah khan Mizoram team-ah a tel.
A hmuhnawm
Football hmuhnawmna chu goal a ni a, Aizawl FC leh Real Kashmir te inkhel first half-ah goal lut lo mah se inkhel hmuhnawm tia sawi theih a ni. AFC tana Kisseka pet goal chu offside vanga pawm a ni lo a, Kashmir tana Ibrahim Nurudeen tauh luh pawh offside vang thoin pawm a ni lo.
Aizawl FC-in inkhel an thunun hret a, Mizo player-te ball inpe kual hmuhnawm ṭhin viau mah se a tawp an zo thei ṭhin lo. Hnahthial tlangval Jeremy Laldinpuia leh Champhai Kanan tlangval R. Ramdinthara ten hun ṭha an hlah ve ve.
Mizo club chance neih ṭhat ber erawh first half injury time-ah a thleng a; Kisseka-a'n mawi zeta a khen chu Chhan Chhana'n changin Tharpuia tan a pe. Champhai Kanan tlangval hian goal-a pet loin Kisseka tana pek a thlang a, Ugandan forward hian hnai tak aṭangin a hlah.
Kashmir lamah Ghanaian striker Nurudeen a khel ṭha a, first ball a lak theih bakah a ke aṭanga ball chhuak a fing ṭhin hle. Mizo tlangval Tluanga a che ṭha bawk a, Aizawl FC attack tur chhu chattu a nih bakah Kashmir goal nawr bul ṭantu a ni bawk.
A goal lo
Aizawl FC-in second half ṭan chiahah Matias Veron leh Jakob Vanlalhlimpuia te an luhtir a, Mizo club hian goal nawr nat sawt tum mah se Real Kashmir-in chance ṭha an ngah zawk.
Ṭan deuh chiahah Ghanaian striker Nurudeen chuan box pawn aṭangin goal pawnah chiah a pet. Real Kashmir hi inkhelah chungnung bik lo mah se AFC tlarhnung tan harsatna an siam fo a, goal hmaa an hriam lo chu Mizo club vanneihna a ni.
Mizo club-in goal khungna chance erawh an nei ṭha zawk. Left back Zodingliana Ralte (Adinga) ball pet chu Kashmir keeper Subhasish Roy Chowdhury-a'n a ti per a, Kisseka-a'n ball per hi chang hmasa ber mah se goal-ah a chantir thei lo.
Team pahnih tlarhma an hriam tawk lo a, minute 90 chhungin goal hmuh tur a awm lo. Mahni muala khel Aizawl FC tan point thum hlawhchhuah loh a pawi a, chutihrualin Real Kashmir-in goal chance an ngah zawk avangin draw hi result awm zawk chu a ni.