Zaninah League Cup quarterfinal Man United vs Charlton; Newcastle Vs Leicester
Carabao Cup quarterfinal chu zanin aṭangin khelh ṭan a ni dawn. Team pariat la dam zingah Charlton Athletic chauh Premier League club ni lo an awm tawh a, Manchester United-in League One club an hmachhawn tur hi an vannei hle.
Zanin dar 1:30 hian Old Trafford-ah Erik ten Hag-a hoten Charlton an mikhual dawn a, quarterfinal inkhel dangah Newcastle United leh Leicester City an inhmachhawn bawk ang. Team pariat la dam zingah Manchester City an la tel a, Citizens-in nomawi pariat an chawi tawh zinga paruk hi kum 2010 hnu lam vek a ni.
Bruno tel loin
Man United midfielder Bruno Fernandes chuan last 16-a Burnley an hneh ṭumin yellow card vawi hnihna a hmu a, Charlton a hmachhawn ve thei dawn lo. Portuguese midfielder hrem tawk hi Donny van de Beek tan hun ṭhaah a ngaih theih a, mahse Dutch midfielder hi Bournemouth an hneh ṭuma a inliam avangin a dam hman a rinawm loh.
Erik ten Hag-a'n Bruno bakah Van de Beek a chhawr thei lo a nih pawhin buaina tur awmin a lang lo. United hian kartawp khan Everton chu FA Cup-ah 3-1 in an hneh a, match sarih chhung an chak zawn tawh bawk.
Tlarhnung lamah United-in duh thlan tur player an ngah a, midfield-ah pawh season ṭantirha an rinrawl Fred leh Scott McTominay te chhawr theih turin an inpeih reng. Tun hnaiah Marcus Rahsford a che ṭha a, English forward hian World Cup zawha match a khelhah goal a khung vek.
Rashford bakah hian Antony, Anthony Martial, Alejandro Ganarcho leh Anthony Elanga te an awm a, heng player-te hi Charlton hmachhawn tur chuan an ṭha tawk vek. Beiseina sang tak nen Borussia Dortmund aṭanga an lakluh Jadon Sancho erawh mimalin training a nei rih a, 100%-a a inpeih hma chu Ten Hag-a'n chhawr a tum lo.
Charlton lam hi
Charlton hi League One-ah match hnih chhung an chak zawn a, Portsmouth (3-1) leh Lincoln City (2-1) te an hneh. Chutihrualin Addicks tan Man United hneh erawh a harsa dawn a, hei hi anmahni ngei pawhin an hrechiang.
Inhliam vanga inlan thei lo tur Charlton full back Mandela Egbo chuan, "Fans tan hun duhawm tak a ni ang a, kei pawhin nuam titakin ka thlir ang. Kum 10 chhunga kan hnathawh thlir hian hetiang hun kan tawng hi a lawmawm. Eng result pawh thleng se nuam kan tih ngei ka ring," tiin Man United an hmachhawn thei chu lawmawm a tih thu a sawi.
Magpies Vs Foxes
Newcastle United-in beisei phak bakin Premier League-ah bul an ṭan ṭha a, amaherawhchu FA Cup-ah an chesual. Magpies hi Sheffield Wednesday hneh loin an tla a, Eddie Howe-a hote hian nomawi an beisei a nih chuan League Cup hi an lak thutak a ṭul hle.
Sheffield an hmachhawn ṭum hian Man United aṭanga an laklet goalkeeper Martin Dúbravka chu bul an ṭantir a, Leicester City lakah erawh Nick Pope-a'n bul a ṭan leh tawh ang. Magpies hi an squad thlirin Premier League, FA Cup leh League Cup-a che ṭha vek tur an ni lo a, chutihrualin League Cup bikah quarterfinal meuh an thlen tawh avangin enliam a rem tawh lo.
Foxes hmachhawn tur hian player pawimawh Sean Longstaff, Miguel Almiron leh Bruno Guimaraes te an inlan ṭhap a rinawm. Leicester City pawhin nikum December thlaa 3-0 ngawta an hneh tawh loh Magpies hneh turin an sa huai an ser a ṭul bawk ang.
Brendan Rodgers hote hian player tlem a zawng indah ṭha ṭhen chungin FA Cup-ah League Two club Gillingham an hneh hram a, League Cup semifinal thleng turin player ṭha zawk an luh a ṭul dawn. Chutihrualin player pawimawh James Maddison a inhliam a; Wilfred Ndidi, Youri Tielemans leh Ayoze Perez ten mawhphurhna an lak a ṭul dawn a ni.