Man City an thiam, Chelsea hmalam hun a thim

Manchester City chuan Premier League-a an hneh zawh hlim Chelsea chu FA Cup-ah an hneh nawn a, Etihad Stadium-a mualneitu chakna zat chu 4-0 a ni. Hei chauh hi a ni lo, Pep Guardiola-a'n player ṭha Erling Haaland, Kevin de Bruyne, Ilkay Gundogan, Ederson leh John Stones te a chhawr lo!

Pathianni zan inkhelah hian Riyad Mahrez-a'n goal hnih a khung bakah Julian Alvarez leh Phil Foden ten goal khat ve ve an khung. Man City hian fourth round-ah Premier League nomawi chuhpuitu Arsenal an hmachhawn dawn a, an vanneihna chu an mualah an khel dawn.

Chelsea erawh FA Cup leh League Cup aṭangin an tla a, Premier League-ah 10-naah an awm mek. London club ṭantute tan nomawi beisei ngam chi a ni tawh lo a, season thara Champions League khelh phak pawh a harsa dawn. German manager Thomas Tuchel thlaktu Graham Potter hian result ṭha a neih ran loh chuan a hna a chân mai a rinawm ta hle.

Mahrez magic
Man City squad a chhah ṭha a, player langsar an chawlhtir chung pawhin midfield-ah Rodri, Bernardo Silva leh Phil Foden te an awm thei a, starting eleven pangngai nen a danglamna a awm lo. Tlarhmaah Riyad Mahrez a awm a, a kawppuite pawh Argentina World Cup nomawi chawipuitu Alvarez leh academy player Cole Palmer te an ni.

Kyle Walker chuan captain armband a hreng a, Manuel Akanji leh Aymeric Laporte te defence laiah inkawpin nipui bazara an lakluh Sergio Gómez chu mual veilamah a awm. Goalkeeper erawh Stefan Ortega a ni a, German keeper hian sulhnu chhuan tur a nei lo thung.

Inkhel an ṭan a, City an thiam zawk tih a lang nghal. Mahrez-a'n Blues rawlthar Lewis Hall chu duh thalin a bum thei a, London club tlarhnung a nghing. Goal hmaah City an hlauhawm a, Foden leh Palmer ten chance ṭha an hlah.

Minute 23-naah Mahrez-a'n a thiam thil a pholang a, freekick aṭangin a ke veilamin goal kilah tak a thun. Minute sarih hnuah ball-in Kai Havertz kut a per avanga an penalty hmuh chu Argentine forward Alvarez-a'n a khung leh bawk.

Kawng engkimah City an chungnung a, Mahrez-a ke vei lam 'cial' zia hmuh turin a awm fo. Minute 38-naah Walker-a siam chu Foden-a'n a khung a, he goal luh theih nana dam dapa Mahrez-a'n a ke veilama ball a la thla chu hmuhnawm a tling.

Chelsea ṭha zawk, mahse...
First half-ah Chelsea an mualpho a, second half-ah an rawn insiamṭha. Mason Mount hmangin Blues-in goal an khung teuh a, goal khung tak erawh an harsat thung. City erawhin penalty aṭangin an khung belh a, Foden-a penalty hlawhchhuah chu Mahrez-a'n minute 85-naah a khung.

London club hi inkhel chawhnu lamah insiamṭha hret mah se a pawi tur ang a pawi zo tawh. Graham Potter-a'n player inhliam chhuanlam tur a nei a, amaherawhchu inhliam nei chung pawhin first half-a an khelh dan chu ngaihdam theih a ni lo.

A chhan chu City hmachhawntu Chelsea-ah hian tawnhriat nei player Mateo Kovacic, Koulibaly, Havertz, Mason Mount, Jorginho, Hakim Ziyech leh keeper Kepa Arrizabalaga te an awm.

Blues ṭantute pawhin an club hmangaih chu an au el phah hial a, manager leh club neitu kal chhuak ta Thomas Tuchel leh Roman Abrahimovich te hming an lam ri. Manager ni lai Graham Potter leh club neitu thar Todd Boehly tan chuan hriat nuam a ni lo ang.

Chelsea boss Potter chuan, "Min ṭantute lungawi lohna hi kan hrethiam a, an ngaihdan hi kan zahsak bawk. Kan hna chu result ṭha neih a ni a, chumi tur chuan theihtawp kan chhuah dawn. Kan result a ṭha miau lo a, sawiselna tur chu kan tawk tur a ni," tiin fan-te auh elna chu a hriatthiam thu a sawi.

Blues hian FA Cup leh League Cup-ah Manchester City an hmachhawn nghal a, an tla nghal ve ve. Potter-a hote hi Premier League match hnuhnung pariatah vawi khat chauh an chak a, vawi li ngawt an chak lo. Champions League-ah erawh London club hian last 16 an lut a, Borussia Dortmund nen an inhmachhawn ang.