Man City khingpui tur Arsenal?

Nizan khan FA Cup third round-ah Arsenal leh Oxford United te an inkhel a, Gunners hian hnehna an chang a nih chuan fourth round-ah Manchester City an hmachhawn ang. Mikel Arteta hote hi Premier League-ah hmahruaitu an ni mek a, Pep Guardiola hote hi pahnihnaah an awm. FA Cup fourth round-ah team ṭha pahnih an inhmachhawn dawn miau avangin team ṭha pakhat zawk chuan fifth round an thleng zo dawn lo tihna a ni.

FA Cup fourth round hi January 27-20 inkara khelh tur a ni a, team 32 an inlan dawn. Third round-ah replay khelh ngai a awm avangin team inlan tur hi a la hriat kim loh a, replay hi January 17-18, 2023 hian khelh a ni dawn. Replay khel tur zingah Liverpool pawh an awm a, Jurgen Klopp-a hote hi an mual Anfield-ah an chak zawh loh avangin Molineux Stadium-ah Wolverhampton Wanderers an hmachhawn leh ang.

Reds hian hnehna an chang a nih chuan fourth round-ah Brighton & Hove Albion an hmachhawn dawn a, round of 16 kalkawng a awlsam dawn lo. Erik ten Hag-a kaihhruai Manchester United erawh an vanneiah a ngaih theih a, Championship-a 13-na dinhmun luah mektu Reading FC an hmachhawn dawn.

FA Cup aṭang hian Premeir League club Newcastle United, Bournemouth, Crystal Palace, Nottingham Forest, Brentford, Chelsea leh Aston Villa te an tla tawh a ni.