Hripui kai chungin tournament khel thei dawn

Australian Open an inhawng zau dawn viau, tournament director Craig Tiley sawi dan chuan player zingah Covid 19 kai an awm a nih pawhin inelna an hmachhawn thei dawn tho niin a lang.

Hri leng chung-changah Australia sorkar a duh fir ṭhin hle, mahse kumin chu a inthlah dul hle thung. Kum 2011 aṭang khan an rama zin lut turte chu hri an kai leh kai loh an endik hmasa vek a, hri leng kai tan an ramah a zin luh theih loh.

Australian Open khel tur pawhin vaccine lak ngei ngei a ngai ṭhin, hei bakah hian tournament an khelh laklawh lai pawhin hri an kai em, tih a khat tawka endik reng an ni a, player dang nen inkalpawh loin khung hran an ni ṭhin bawk.

Tournament director Craig Tiley chuan, "Player inlan tur bakah tournament in a kaihhnawih mi hrang hrangte chu kan kalphung tur kan inhrilh uluk viau a, damlo leh enkawl ngai an awm chuan damdawi thiam ten an enzui nghal ang.

"Tunah chuan hrileng hi kan khawsak pui thiam tawh viau a, thil pangngai a ni tawh ber mai. A nihna takah chuan, tuna kan ruahman dan chuan player zingah hri kai an awm a nih pawhin an inkhel thei ang," tiin a sawi.

Season hmasa khan Novak Djokovic chu Melbourne khawpui aṭangin thawn haw a lo ni tawh, kuminah erawh Serbian star hi harsatna nei loin a inlan thei tawh dawn - Australian Open hi January 16 aṭanga khelh ṭan tur a ni ang.