Bale-a'n Real Madrid-a cham zel a duh

Real Madrid match hnuhnung pasarihah Gareth Bale a inlan lo a, hetichung hian Welsh star hian Spanish club-a cham chhunzawm a duh.

Kumina khelh tur European Championship chu nakkumah sawn a ni a, inelna hmachhawn tur zingah Wales a tel. Hemi a nih avang hian Wales coach Ryan Giggs tan Gareth Bale a chanchin hi hriat nuam a ni lo a, Euro 2020 khel turin 'match fitness' a neih loh a hlauhawm.

Covid-19 hnuah Bale hi vawi hnih chauh a inlan a, Real Madrid tana khelh hnuhnun ber chu June 24 daih kha a ni. Amaherawhchu Bale hian kar khatah £350,000 a hlawh a, khel lo mah se sum lakluh a tlem phah loh avangin Spanish club liana cham zel a duh. Kum 31 Bale hian a thutlukna hi Wales coach Giggs pawh a hrilh tawha sawi a ni a, Real Madrid boss Zinedine Zidane-a'n a ngaihdan a thlak a nih loh chuan Bale hi season tharah a inlan tam a rinawm loh hle.