Stevenage lakah Aston Villa tlawm

FA Cup third round-ah Aston Villa an mualpho a, an mikhual League Two club Stevenage lakah 2-1 in an tlawm - Premier League club tan mualphona tawpkhawk a ni a, kum 2016 hnuah FA Cup-ah chak an la nei lo tluang zel.

Villa tan hian Morgan Sanson chuan minute 33-naah goal hmahruai a khung a, kum 28 mi midfielder tan Aston Villa jersey ha chunga goal a khung hmasak ber a ni bawk.

Premier League club tan he goal khat lek hi a tawk mai dawn niin a lang hman a, mahse, English fourth division club Stevenage-in ngaihdan dang an nei.

Hun tawp nan minute nga chauh a awm tawh tihah Leander Dendoncker chuan Dean Campbell a pawt thlu a, referee Graham Scott chuan freekick pek tum zet mah se penalty spot a kawk a, Dendoncker a hnawt chhuak bawk.

Villa Park-ah Jamie Reid chuan penalty hi goal-ah a chantir a, minute 90-naah Campbell chuan chakna goal a khung zui - Villa khelmualah Stevenage an chak!

Aston Villa boss Unai Emery-a'n FA Cup nomawi chawi an tum thu sawi mah se a thusawi chu boruakah a thamral a, Villa tan FA Cup champion tur chuan season khat dang nghah leh phawt a ṭul.